Xefe Departamentu Justisa (PNTL), Superintendente Xefe Agostinho Gomes da Silva hatete, misaun PNTL nu’udar forsa seguransa Estadu Timor-Leste, maibé hetan kritika barak husi komunidade, tanba membru sira komete aktu disiplinar.
“Durante tinan ida, departamentu justisa PNTL rejista membru hamutuk 186 komete kazu infrasaun disiplinar, prosesu finaliza ona 115 hela 61 sei iha prosesu investigasaun nia laran inklui kazu 10 pendente iha Tribunál”, informa Agostinho, iha Kuartel Jeral, tersa (11/01).
Kazu 10 ne'ebé sei pendente iha tribunál, tanba kazu dixiplina ne'ebé mak hala'o husi membru sira, iha indisius ba krime, ho ida ne'e, mak departamentu justisa aprejenta ba ministériu públiku hodi halo prosesu.
“Kazu 10 sei pendente hela iha Tribunál ne’e, tanba membru sira komete kazu iha indisiua ba krime, entaun ita intrega ba Ministériu Públiku mak halo prosesu”, dehan nia.
Kazu 186 ne'e, ba sira ne'ebé nia prosesu finaliza ona, hamutuk 115, ho nia atinjimentu hanesan Arkivamentu sein pena dixiplina iha kazu 36, aplika pena dixiplina, reprensaun deskrita kazu 46, aplika pena dixiplina multa loron 10 to'o 30 iha kazu 17, aplika pena dixiplina suspensaun loron 31 to'o 90 kazu 11, no aplika pena dixiplina suspensaun husi loron 91 to’o 121 iha kazu 2.
“Ami aplika mós pena dixiplina demisaun, iha kazu ida, maibé la inklui kazu tolu ne'ebé mak foin dadauk konsellu superior PNTL deside, tanba ne'e, kazu 2019 nian, ami fó sai ne'e, kazu ne'ebé akontese no prosesu iha 2021, ida ne'e mak ami fó sai”, esplika Agostinho.
Tanba ne’e, departamentu justisa PNTL durante tinan 2021, rejista kazu infrasaun dixiplina 186 ne'ebé fó sai, membru sira ne'ebé komete krime dixiplinár barak liu, mak, Komandu Jerál PNTL, komandu PNTL Munisípiu Dili, Unidade Espesial Polísia (UEP), Unidade Polísia Marítima (UPM), no Komandu Munisípiu Baukau.
“Ida ne'e mak ami presiza fó sai ba públiku para bele hatene, kona-ba saida komandu Jerál PNTL halo esforsu hodi hadi'a dixiplina patriota PNTL, durante tinan 2021, atubele garante dixiplina norma polisial, nune'e membru sira sai profisionál, hodi hala'o servisu tuir lei no ordén ne'ebé vigora iha nasaun RDTL”, afirma nia.
Kazu infrasaun ka tipu krime ne'ebé membru PNTL hamutuk na'in-186 komete ne'e, tanba viola dever sira ne'ebé regula iha regulamentu dixiplinár PNTL nian.
“Membru sira kontra regra PNTL nian, ne'ebé regula iha regulamentu dixiplina PNTL nia, maibé, ita la define detallamente ida pur ida, tanba ne'e prosesu dixiplina halo bazeia ba regulamentu dixiplina PNTL ne'ebé mak define tiha ona, tanba ne'e ita halo prosesu sira”, deklara nia. (*)
