"Ita haree situasuan rua, nesessidade operasaun no nesessidades instituisaun, buat rua ne’e importante tebes. Entain Komandu PNTL halo rotasaun ba komandante Munisípiu no unidade sira, ne’ebé inklui mós inspetór sira lidera unidade sira, tanba nesessidade operasaun no instituisaun nian”, informa Komisáriu Faustino da Costa, iha Komandu jerál PNTL, Kaikoli, segunda (03/01).
Tanba ne’e, Komandante PNTL Munisípiu Covalima Sesante, Superintendente Xefe António Maria de Sá troka Komandante Sesante Munisípiu Baukau, Superintendente Xefe Armando Monteiro.
Komandante Armando Monteiro troka Komandante Relasaun Públika PNTL, Superintendente Xefe Arnaldo de Araújo. Enkuantu Komandante Arnaldo de Araújo muda ba komandante Relasaun Internasionál PNTL nian.
Nune’e mós, Komandante UPM Sesante, Superintendente Assistente Basílio de Jesus, asume fali kargu nu’udar Komandante PNTL Munisípiu Covalima, hodi troka fali Komandante António Maria de Sá.
Enkuantu, atuál Segundu Komandante UPM, Inspetór Xefe, João Cesar da Silva, assume fali kargu Komadante UPM no Komadante sesante Operasaun UPM, Inspetór Xefe Aniceto Fátima assume fali kargu hanesan Segundu Komadante UPM.
Ho mudansa ne’e, tanba Inspetór Xefe, João Cesar da Silva, bele ona lidera UPM, hala’o servisu nu’udar Segundu Komandante iha UPM, nomós tuir ona kursu formasaun promosaun ofisiál no superiór PNTL nian.
“Sé ho situasuan ida hanesan ohin temi kona-ba atividade lubuk ida PNTL sei hasoru iha tinan ida-ne’e, depois ita tau ema ne’ebé foun iha situasuan ida-ne’e, ha’u hanoin la’ós nesessidades atu rezolve problema. Ita tau ida-ne’ebé iha ona esperiénsia servisu iha ne’ebá depois servisu rezolve”, esplika nia.
Kondisaun saúde Komandante PNTL Sesante Munisípiu Baukau, Superintendente Xefe Armando Monteiro nian la estável, tan ne’e Komandu deside muda mai Komandu, nune’e bele halo tratamentu saúde.
Entretantu, iha serimónia tomada de posse ne’e, Komandante PNTL Munisípiu Covalima foun, Superintendente Assistente Basílio de Jesus la partisipa, tanba problema saúde. (*)
