Segundu Komadante Komandu PNTL Munisípiu Baukau, José Casemero hatete, iha loron 31 fulan-dezembru tinan 2021 situasaun jerál iha Munisípiu Baukau la'o normal, maibé iha loron 01 fulan-janeiru tinan 2022 mak rejistu kazu balun.
"Ne'e ligasaun akontese iha Gariuai Bamori konfrontasaun tuda malu uma balun hetan estragus, depois na'in-ida hetan kanek mak PNTL ba ka'er nia ho armas brankas," dehan Casemero, segunda (03/01).
Kazu ne’e, PNTL Baukau rejistu ona iha Ministéiru Públiku (MP) Munisípiu Baukau atu prosesa tuir dalan legal.
Alende ne’e, PNTL Baukau mós rejista kazu balu ne’ebé akontese ho loron hanesan iha área teulale vila antiga Baukau ne’ebé rejulta joven na'in-2 kanek.
“Joven na’in-2 hemu tua hamutuk mak fila atake malu to'o hetan hotu kanek, maibé konsege rezolve tuir de'it família”, nia haktuir
Nune’e, iha mós akontesimentu ida iha Kaisidu no Bukoli ne'ebé joven balun hakanek malu, tanba ho kondisaun lanu.
"Laiha ema-ida mate durante ne'e, na'in-4 mak hetan kanek ba halo tratamentu iha Horex (Óspital Baukau) agora rekupera hotu ona, sira mós liberta hotu ona, tanba kumpri ona prosesu investigasaun," nia afirma. (*)