Akontesimentu ne’e, iha loron 21 fulan-dezembru tinan 2021 maizumenus tuku 10:00 kalan oras timor-leste no uma ne’ebé estragus kompostu husi Aldeia Uaisemu, Makadae de Baixu, Luliheni, Lekiloiuatu no Aubaca.

Dezaster ne'e, la rezulta komunidade kanek no mate, tanba halai sai husi uma hodi ba asegura-aan iha viziñu sira ne'ebé besik.

Xefi Suku Bukoli, Terezinha dos Reis haktuir, akontesementu ne’e informa ona ba parte kompetente inklui konsellu suku no komunidade atu tuun dereita hodi ajuda maluk sira ne’ebé hetan dezastre.

"Ha'u husu apoiu nesesidade urjentemente, tanba dadaun komunidade nia dapur laiha, tanba estragas totál, ha’u rekomenda ba Governu haree ho matan atu analiza," dehan Terezinha, kuarta (22/12).

Tanba ne'e, Governu presiza ajuda emerjensia ba família sira ne’ebé afeita ba dezstre, liliu fatin toba inklui hahan.

Nune’e, Servisu Munisípal Protesaun Sivil no Dezastre Naturál Baukau akompanã husi Administradór Postu Baukau Vila no Autoridade Suku, hahú tuun dirieta iha tereñu hodi observa situasaun no rekoilla dadus.

Vítima, César Gonçalves da Silva haktuir, rai lakan hahú tarutu akonpaña ho anin boot no udan derepenti halo ai-tohar no sobu kalen to'o estragus.

"Horkalan akontesementu, família uma laran inklui bebe na’in-3 ho avo tenki ba deskansa fali iha viziñu nia uma, tanba kondisaun uma la permite atu toba," dehan César

Sorin seluk, vitíma Nazário Ximenes sente triste ho dezastre naturais ne'e, tanba iha loron 10 fulan-outubru tinan 2021, nia parte lakon uluk ona uma ida ne’ebé akontese insendiu.

"Baraka ne'ebé ami kalan toba ne'e hetan estragus, nune’e hau senti triste tebes ami boot na'in-5, labarik na'in-3 ami laiha ida kanek,  maibé sasan mak la salva," Nazário akresenta

Tuir Observasaun www.tempotimor.com iha terenu nota katak, akontesementu ne'e estraga mós rin elektrisidade, kareta kijang ida ai hanehan, EBF Bukoli anin sobu, vitíma na'in-2 kanek, ai tohar inklui uma barak mak estragus. (*)