Print this page

PNTL Baukau Limita Komunidade Sunu Fugetis iha Selebrasaun Natal no Tinan Foun

By December 14, 2021 596
Komadante PNTL Munisípiu Baukau, Superintendente Xefe Armando Monteiro. Komadante PNTL Munisípiu Baukau, Superintendente Xefe Armando Monteiro. Foto Tomas Freitas

Tempotimor (Baukau)‐ Komadante Polísia Nasionál Timor-Leste (PNTL) Munisípiu Baukau, Superintendente Xefe Armando Monteiro fó autorizasaun ba komunidade sira só bele sunu fugetis iha selebrasaun misa natal no tinan foun de’it, maibé loron seluk laiha autorizasaun.

"Ita autoriza ba ita nia komunidade bainhira selebrasaun misa natal no simu tinan foun 2022 só loron ida ne'e de'it mak komunidade iha Baukau festeja loron ne'e ho fugetis", dehan Armando tersa (14/12).

Maibé, atu selebra loron natal no simu tinan foun 2022 ho fugetis tenke haree mós ba fatin nia luan atu labele impede movimentu públiku tantu ordem públiku.

Nune'e, husu ba komunidade sira ne'ebé dadaun iha fugetis rai halo di'ak no utiliza iha tempu natal no selebra iha tinan foun 2022.

Tanba, iha loron 09 fulan-dezembru tinan 2021, PNTL Munisípiu Baukau ho Autoridade Munisípiu sira no entidades hotu iha Munisípiu, liu husi enkontru fó ona orientasaun ba autoridade sira iha nivél postu atu divulga informasaun ba komunidade ne'ebé ulitiza fugetis iha tempu natal no simu tinan foun 2022.

Komandu PNTL Munisípiu Baukau sei destaka membru sira iha igreja Baukau laran atu fó seguransa masimu ba Misa selebrasaun loron Natal no simu Tinan foun.

PNNTL mós fó hanoin ba komunidade sira ne'ebé hakarak halo prezepiu hodi selebra loron natal no simu tinan foun tenke dook husi dalan públiku minimu metru 10-15, nune'e labele halo perturbasaun iha dalan públiku.

"Fatin prezepiu ita bandu, labele halo konsumu alkóliku, labele utiliza prezepiu halo dahur dansa no toka muzika ne'ebé laiha relevante ho loron natal ida ne'e, maibé bele toka muzika ne'ebé relevante ho loron natal nian", nia hateten

Bainhira komunidade sira la halo tuir regra hirak ne'e mak servisu operasaun hetan iha tereñu sei hola medida no prosesu tuir lei ne'ebé vigora ona iha nasaun Timor-Leste. (*)

 

 

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items