Print this page

PNTL-F-FDTL Sei La Tolera Sidadaun Kria Konflitu iha Loron Boot

By December 14, 2021 833
Xefe Departamentu Justisa Polísia Nasionál Timor-Leste (PNTL), Superentidente Xefe Agostinho Gomes. Xefe Departamentu Justisa Polísia Nasionál Timor-Leste (PNTL), Superentidente Xefe Agostinho Gomes. Foto Suplay

Tempotimor (Dili)-Xefe Departamentu Justisa Polísia Nasionál Timor-Leste (PNTL), Superentidente Xefe Agostinho Gomes deklara, PNTL sei la tolera sidadaun ne'ebé kria konflitu iha loron boot natál no tinan foun.

"Ohin ne'e ita hahú operasaun konjuntu, no ita sei halo mos check point tama sai bairu iha Kapitál Dili, no ita sei  asegura, maibé ita sei la tolera sidadaun sira ne'ebé halo konflitu ou kria problema iha loron boot natál no tinan foun”, deklara Superentidente Xefe  Agostinho Gomes, iha Kuartel Unidade Polísia Militar, Kinta-ki’ik, segunda (13/12).

Aleinde sidadaun inklui mós membru F-FDTL no PNTL ne'ebé mak uza armas fora husi oras servisu, ka  inklina-an iha konflitu ruma, sei la fó toleránsia hotu.

"Ita sei la tolera ba gualquer se de'it mak halo konflitu ka krime durante loron Natál no Tinan Foun, inklui mós membru F-FDTL ka PNTL ne'ebé mak karik ita identifika komete iha konflitu ruma sei la fó toleránsia, nune'e mós halo operasaun mak hetan PNTL ka F-FDTL uza arma ruma fora husi oras servisu  sei kaptura husi departamentu PROFOS enkuantu membru F-FDTL ruma mak komete sei kaptura husi Polísia Militar (PM), no kontinua prosesu sira tuir lei regulamentu dixiplinar ida-idak ninia”, dehan nia.

Komandante Interinu Unidade Polísia Militár (PM), Kapitaun Francisco Xavier dos Reis Neto deklara, sei la fó toleránsia ba kualker se de'it, tantu membru PNTL ka F-FDTL ne'ebé mak komete krime ruma.

"Tanba ita mak seguransa ba liberdade ema hothotu nia durante festa loron boot Natál no Tinan Foun, nune'e sei la fó toleránsia ba kualker se de'it mak  inklina-an iha problema, nune'e mós ba membru PNTL no F-FDTL ne'ebé mak uza armas fora husi oras servisu nia”, informa nia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items