Enkarregadu Operasaun Polisia Nasionál Timor-Leste (PNTL), Munisípiu Díli, Inspetór José Maria Boavida hatete, parte seguransa prontu ona ba preparasaun hodi asegura Saudozu nia Sinzas bainhira to'o iha Díli.
"Ami polísia nian sei ba prepara ami-nia planu atubele asegura Max Stahl nia sinzas durante halo komboiu husi Aeroportu mai to'o iha fatin, tanba segurana ne'e ami prontu ona atu aseguran iha loron ne'e”, dehan Inspetór José iha Centru Audiuvizual Max Stahl Timor-Leste (CAMSTL), segunda (13/12).
Tanba Saudozu nia sinza husi nasaun Austrália mai to'o Aeroportu Internasinál Prezidente Nicolao Lobato-Komoro Dili, ho aviaun Qantas iha tuku 11:45 oras timor-leste (otl).
Maibé kona-ba rote iha ona, Polísia Tránzitu sira ho Task force prepara taka dalan bainhira Max Stahl nia Sinza husi Airoportu atu liu mai.
"Rote ne'ebé atu liu mak husi Aeroportu mai iha Ponte CPLP hafoin ita tun ba fali iha tasi sa'e filafali ba Kuluhun to'o Bekora, depois sei liuhusi Eskola 12 Novembru, tun ba Balide no kontinua mai iha Katedrál no ikus mai para iha Centro Audiuvizual Max Stahl Timor-Leste (CAMTL) nian”, esplika nia.
Christopher Wenner, koñesidu liu ho naran Max Stahl, nia jornalista erói ida ne'ebé halo filmajen ba Masakre Santa Cruz iha loron 12 Novembru 1991 to'o ikus mundu rekoñese katak iha Timór iha duni funu ne'ebé hamate ema barak.
Saudozu Max Stahl, hakotu iis iha loron 28 outubru 2021, iha Brisbane-Austrália, tanba moras ne'ebé nia sofre kleur ona. (*)A