Print this page

PD 'Hakarak' Governu Loke Fronteira, CNRT Husu Esplikasaun 

Deputadu bankada Partidu Demokrátiku (PD), Adriano do Nacimento. Deputadu bankada Partidu Demokrátiku (PD), Adriano do Nacimento. Foto Suplay

Tempotimor (Dili)-Deputadu bankada Partidu Demokrátiku (PD), Adriano do Nacimento, hakarak Governu loke fronteira ba públiku atubele asesu ba halo atividade.

Maibé Bankada CNRT, husu nafatin ba Governu atubele klarifika fronteira ne’ebé loke tuir tempu ne’ebé define.

"Ita labele taka permanente fronteira, tan de'it ita tauk covid ne'e”, dehan nia liuhusi debate espesialidade proposta OJE 2022 iha PN, segunda (13/12).

Pozisaun PD mós haree katak presiza loke fronteira atu  fasilita ema ruma ne’ebé bele ba mai, liliu estudante sira ne’ebé mak hakarak ba hala'o estudu iha estranjeiru, nomós atividade business ne’ebé mak povu bele hala'o.

Tanba númeru covid-19 agora ne'e tun no kuaze atu laiha ona, nomós Timor-Leste to'o agora seidauk rejista vírus foun ne’ebé mak mosu.

"Enkuandu iha fali ita hola desizaun, maibé ita labele taka permanente fronteira, tan de'it ita tauk Covid-19 ne'e, e entidade sira balun hatete ita tenke hatoman-an moris ho Covid-19, tanba sei kleur sai husi ita-nia moris”, dehan nia.

Xefe Bankada CNRT, Duarte Nunes, husu Governu presiza klarifika objetivu kona-ba loke fronteira ba públiku.

"Pratikamente semana ida, Depois de ita sente hanesan livre oituan tanba ita uza servisu povu tomak hotu nia servisu, ita bele sente dehan la ses husi problema moras ne'e maibé ita sente dehan karik laiha ona, agora depois semana ida ou rua, loke tiha fronteira. E kuandu loke fronteira ne'e iha objetivu, e ha’u espera katak ida ne'e Governu sei esplika ninia objetivu saida”, hatete nia.

Tanba pandemia covid-19 ne’ebé Timor-Leste durante tinan 2, povu trauma, mate, balun estres, tara-an.

Ne'e duni Governu tenke esklarese loke fronteira no husik turista sira tama mai ne'e atu elava ekonomia, ka Governu loke atubele hasoru Covid variante foun lori mai rai laran. (*)



Rate this item
(0 votes)
Last modified on Monday, 13 December 2021 18:02
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items