Komandante UPF, Superintendente Euclides Belo hatete, sidadaun na’in-3 ne’e membru UPF kaptura liuhusi check point rutina iha fronteira terrestre dalan prokolu.
“Atu informa de’it, ohin tuku 6 dader iha kuartel UPF oin ita-nia membru UPF kaptura sidadaun timoroan mane na’in-tolu ho inisial JL, husi Suku Cassa-Ainaro, ne’ebé na’in ba objetu sira hanesan farda Grupu Arte Marsiál (GAM) husi PSHT (Persaudaraan Setia Hati Terate) hamutuk ho sertifikadu enkuantu na’in-rua seluk ho inisial JS ho JA, husi Suku Bekora-Dili ne’ebé fasilita tula autór ne’e ho karreta númeru matrikula A.18.781, marka Avanza kór metan”, deklara Superintendente Euclides Belo, iha Kuartel UPF Nu-Badak-Batugade, kinta (09/12).
Evidénsia ne'ebé rekolla mak hanesan, farda treinu kalsa no faru PSHT pares 3, buku kesan PSHT 3, sertifikat wasiat 6, piagam 6, buku pedoman 2, sertifikat sumpah 6 iha karreta laran.
Dadaun ne’e, joven na’in-tolu ne’e foti ona sira-nia identidade no entrega ona autór sira ne'e hamutuk ho evidénisa ba Komandu PNTL Munisípiu Bobonaro hodi kontinua prosesu identifikasaun no investigasaun. (*)
