"Atividade pasa revista ba komandu PNTL Munisípiu Dili ho objetivu tolu, ida kona-ba promove no hametin relasaun komandu PNTL Munisípiu Dili ho Departamentu justisa Nasionál PNTL, daruak pasa revista ba uniforme membru PNTL hotu, ikus mak halo enkontru ho komandu PNTL Munisípiu Dili hodi diskute kona-ba oinsá atu garante aplikasaun regra disiplinar no Lei sira iha PNTL”, dehan Diretór Departamentu Justisa Nasionál PNTL, Superintendente Xefe Agustino Gomes, iha Komandu Munisípiu Dili, Kaikoli, kinta (02/12).
Tuir pasa revista identifikadu katak, uniforme balun ne'ebé membru PNTL sira uza la’ós uniforme PNTL nia, maibé roupa obralan.
"Nune'e kona-ba membru PNTL sira ne’ebé uza roupa obralan, ekipa inspeksaun sei rekolla hotu dadus hodi aprezenta ba komandu Jerál PNTL mak bele deside, tanba membru Polísia sira uza dala ruma sira iha problema ruma”, hatete nia.
Tanba ne’e iha inspeksaun pasa revista, membru PNTL ida-idak hatudu sira-nia karta kondusaun nomós kartaun indentidade PNTL ho emblema sira ne’ebé estadu atribui ona hodi servisu ba povu no nasaun.
Entretantu iha atividade inspeksaun ne’e mós, membru PNTL munisípiu Dili barak mak hato’o preokupasaun, tanba roupa sira ne’ebé durante uza sai malahuk no balun nakles ona, tanba ne'e sira hasai rasik osan hodi sosa obralan hodi suku fali ho emblema PNTL nian, hodi uza halo seguransa ba povu no nasaun. (*)