“Foin dadauk ne’e proposta ba hotu ona, Ezonera Xefe Estadu Maior Coliate kona-ba se mak atu troka nia, entaun iha ne’ebá ami propoin ne’e, Pedro Klamar Fuik mak sei troka Coliati, no Coaliati mak sei ba troka Pedro Klamar Fuik iha IDN”, esplika Lere, iha konferénsia Imprensa ne’ebé hala’o iha Kuartel Jenerál F-FDTL, Fatuhada, Dili (02/12).
Komodoro Pedro Klamar Fuik, ne’ebé lidera IDN kuaze tinan sanulu ona, tanba ne’e to’o ona tempu muda pozisaun ba fali Xefe Estadu-Maior Forsa Armada (XEMFA) hodi troka atuál Xefe Estadu Maior Forsa Armada, Calisto Santo “Coliati”.
Nomeasaun ida ne’e rasik halo liuhusi Reuniuan Konsellu Superior Militar ne’ebé envolve Direita Ministru Defeza no Koronél sira iha instituisaun F-FDTL.
“Ha’u bele dehan katak iha ne’e, so ema ne’ebé kompetente lidera IDN, mak ema na’in tolu, Brigadeiro Coaliati, Neves no Pedro, ha’u la minimiza ha’u-nia ofisiál sira iha ne’e mas ema na’in-tolu ne’e iha kompetente duni no agora ha’u propoin Coaliti ba lidera IDN”, dehan Lere.
Tanba atu lidera IDN ne’e la’ós ema bainbain, maibé iha neebá forma ofisiál, forma komandu polísia ninian, to’o forma xefe suku no líder sira.
“Entaun la’ós kuakler ema mak ba, só Coaliati mak bele, tanba ne’e ami propoin iha Kosellu Superior Militar ne’ebé Prezidente husi Ministru Defeza hodi propoin ba Governu hodi Ezeonera no Nomea nian ba lidera IDN laiha buat seluk husi ne’e”, deklara Lere.
Tanba ne’e husu ba públiku labele halo interpretasaun oioin ba nomeasaun ne’e.
“Kadavez ita-nia portugés ne’e halo ema konfusaun, maibé ha’u hanoin husu ba públiku tenke komprende iha ezonerasaun mak foin iha nomeasaun nune’e atu okupa kargu foun”, afirma nia.
Xefe Estadu Maior-Forsa Armada (XEMFA), Brigadeiro Jenerál Calisto dos Santos “Coliate” hatete, nu’udar militar nia parte simu desizaun Governu nian.
“Nu’udar militar ha’u hakruk ba desizaun no orden, mudansa iha komandu nia laran katak ha’u sei ba kaer fali Institutu Defeza Nasionál ita-nia maun Komadoro Pedro Klamar, nia mak sei mai asume fali pasta Xefe Estadu-Maior”, deklara nia. (*)
