"Sim ita hotu akompaña,no publiku hotu preokupa atividade no movimentu ilegál ne'ebé kontinua akontese iha fronteira ne'ebá, durante ne'e fundasaun mahein nia haree asuntu liga ho fronteira ne'e problema ida ne'ebé ita dehan seidauk atensaun di'ak husi seguransa sira, tanba durante ne'e ita haree tempu sira ema hatama sasán ilegál, ema halo tranzasaun ilegál, e depois ema movimentu ilegál tantu husi Indonézia mai Timor e husi Timor ba Indonézia ne'e kontinua akontese”, dehan Sancho Xavier, iha nia kna’ar fatin, Bairo Sentral, kinta (02/12).

Tanba ne'e, problema kompleksu, liliu iha seguransa ninia, tanba iha ne'ebá motivu ida mak atividade familiar no kultura kontinua la’o nafatin, maske hetan atuasaun husi Polisia Nasionál Timor-Leste (PNTL) liuhusi Unidade Patrollamentu Fronteira (UPF) kada loron, maibé movimentu ilegál kontinua mosu.

"Iha ne'ebá ne'e sidadaun sira sempre iha relasaun família no kultura, entaun ida ne'e mós provoka movimentu ilegal sira ne'e kontinua akontese, buat ne'ebé FM hanoin atu prevene no kombate atividade ou movimentu ilegál no forma sira seluk ne'e la'ós responsabilidede PNTL nia de'it, maibé responsabilidede polítika mós, oinsá atubele haree dezenvolmentu iha fronteira ne'e”, dehan nia.

Tanba ne'e presiza polísia ninia prezensa no polísia tenke uza sira-nia sistema polisiamentun ne'ebé estabelese, hanesan halo kordenasaun ho autóridade lokál sira, kordenasaun ho forsa seluk oinsá mak uza sistema polisiamentu ho efetivu atubele halo prevensaun ne'ebé akontese.

"Durante ne'e ita haree prevensaun ne'e sei falta no fraku entaun buat ne'ebé mosu ne'e mak ita foin halo atuasaun, maibé atu halo atuasaun ne'e ita sei fraku tanba kestaun ne'ebé FM identifika ita-nia difikuldade sira iha ita-nia PNTL rasik, hanesan difikuldade falta rekursu, kondisaun no fasilidade ne'ebé bele apoiu sira-nia servisu ne'e la'ós de'it iha rai laran maibé mós iha fronteira nia ne'e”, afirma nia. (*)