“Ezonerasaun ne'e normál, tanba Xefe Estadu-Maior "Coliate" ne'e servisu tinan rua, nia mandatu tinan rua, iha lei tinan rua, depois tinan rua tenke muda, no tau fali ema seluk, ne'e iha vida tropas mak hanesan ne'e ona”, dehan Ministru Filomeno da Paixão iha PN, kinta (02/12).

 Maske Governu bele aprova, maibé sei hein mós aprovasaun husi Prezidente Repúblika (PR) hanesan komandante Supremu Forsa Armada, hafoin fó sai ba públiku katak se mak sei troka.

"Tanba ne'e, imi keta hakfodak iha ne'e, laiha ezonerasaun deprovasaun, tanba iha tropas ne'e sempre troka malu”, afirma nia.

 Entretantu desizaun ne'e mai husi reuniaun konsellu militár, atu konkorda ka la Konkorda, hanesan ema militar iha direitu atu nafatin prontu hodi kumpri.

Antes ne’e iha loron kuarta (01/12) Governu liuhusi reuniaun Konsellu Ministru (KM) aprova projetu deliberasaun kona-ba ezonerasaun no nomeasaun Xefe Estadu-Maiór Forsas Armadas (XEMFA), Brigadeiru Jenerál Calisto dos Santos Coli "Coliate" no Komandante Komponente F-FDTL sira.

"Ohin Ministériu Defeza hamutuk ho Primeiru Ministru (PM) altera ona nomeisaun balun, iha F-FDTL nia laran, proposta ne'e atu halo nomeisaun foun, ba Xefe Estadu-Maiór Forsas Armadas (XEMFA), Brigadeiru Jeneral Coliate atu halo alterasaun halo mudansa hodi troka XEMFA anteriór hodi troka foun”, deklara Ministru Prezidensia Konsellu Ministru (MPKM), Fidelis Leite Magalhães, iha palásiu Governu, kuarta (01/12).

Razaun Ezonera Estadu-Maiór Forsas Armadas (XEMFA), Brigadeiru Jenerál Coliate ne'e medida ida ne'ebé mak kontribui atu F-FDTL ne'e, tanba ne'e importante iha koñesimentu ba área hothotu iha forsa Armada.

"Di'ak liu mak iha mudansa sira hafoin kargu ruma tanba kaer ona tinan barak, tanba ne'e mak muda fali ba kargu sira seluk ida ne'e faz parte iha kareira militár”, nia esplika.

Kona-ba deliberasaun ezonera Xefe Estadu-Maiór Forsas Armadas (XEMFA), Brigadeiru Jenerál Coliate hamutuk komandante komponente F-FDTL ne'e sei aprezenta ba Prezidente Repúblika ne'ebé nia kna’ar mós hanesan Komandante Supremu Formas Armada nian.

"Ezonerasaun no nomeasaun ne'e sei hato'o ba Prezidente Repúblika hanesan komandante Supremu ne'ebé Governu propoin naran sira ba eselénsia Prezidente Repúblika atu halo desizaun”, afirma nia.

Deliberasaun kona-ba Ezonerasaun ba Xefe Estadu-Maiór Forsas Armadas (KEMFA), Brigadeiru Jeneral Coliate hamutuk ho komandante komponente F-FDTL ne'e aprezenta husi Primeiru Ministru (PM), Taur Matan Ruak ho Ministru Defeza (MD), Filomeno Paixão ba Konsellu Ministru. (*)