"Husu atu koopera ho PNTL hodi hato'o keixa bainhira hetan membru PNTL balun envolve iha atividade ilegál, karik deskonfia sasán balun (hanesan fugetis) ne’e iha membru PNTL mak fa’an ba komunidade ka halo atividade ilegál seluk presiza hato’o keixa maibé tenke bazeia ba faktu no evidénsia ruma hanesan foto ka vídeo ruma, nune’e informasaun ne’ebé tama labele sai hanesan difamasaun”, dehan Antonio Armindo, iha Ministériu Interior, Vilaverde, tersa (30/11).

Hanesan negósiu ba fugetes nia, tanba dadaun fugetes komesa tarutu iha kada bairu mesmu PNTL bandu negosiante no komunidade sira fa'an no sunu fugetes tanba bele prejudika ema seluk nia saúde.

“Iha Kapitál Dili, ita komesa rona fugetes tarutu iha kada bairu sira ne’ebé bele afeta ba ema seluk nia saúde, tanba ne’e komunidade balu mak haree ema se de’it mak fa’an inklui membru PNTL ruma mak halo negósiu ba fugetes sira ne’e bele kontatu ba eskuadra PNTL ne’ebé besik ka liuhusi liña emerjénsia PNTL nian 3310080 hodi halo atuasaun ka bele mós lori mai ami-nia fatin no ita sei asegura sira-nia identidade”, hatete nia.

Tanba durante ne’e, Komandante Jerál PNTL sempre ko’alia no alerta bebeik kona-ba envolvimentu membru PNTL iha kualker asaun mak fora husi lei no orden sei prosesu tuir lei ne’ebé vigor tanba komandu sei la tolera aktu sira ne’ebé kontra lei.

Dadaun ne'e iha fronteira komunidade sira komesa halo prevensaun ajuda membru PNTL sira hodi identifika atividade transasaun ilegál no informa ba PNTL. 

“Ita haree iha semana ida ne’e nia laran PNTL konsege trava atividade transasaun ilegál iha fronteira tanba kooperasaun di’ak ho komunidade. Tanba ne’e nafatin alerta ba sira ne’ebé mak haree ka hatene informasaun sira ne’e ajuda halo prevensaun hodi evita atividade ilegál sira ne’e”, dehan nia. (*)