"Ikus ne'e komesa akontese ona kazu estudante sira halo pasa revista no halo konflitu entre eskola iha Dili laran, no eskola sira ne’ebé ita identifika ona, hanesan eskola Sekundária Jerál 4 de setembru, Nobel da paz, 10 de dezembru no finantil, ho nune'e ita koloka ona membru polísia iha eskola sira ne'e atubele kontrola no halo atuasaun sedu bainhira sira halo konflitu ruma”, dehan Komandante PNTL Munisípiu Dili, Superintendente Xefe Henrique da Costa, iha Kaikoli, segunda (29/11).

Tanba iha semana kotuk ne'e estudante husi eskola Sekundária Nobel da Paz no Eskola Sekundária Jerál 4 de setembru halo asaltu malu iha dalan hodi rezulta estudante balun kanek no tuda rahun transporte públiku ida

Husi akontesimentu ne'e PNTL konsege kaptura estudante na’in-rua ne'ebé sai autór no lori ba komandu Dili hodi bolu sira-nia inan aman no eduka de’it  tanba estudante nia idade sei ki’ik.

“Adjuntu  Diretór Eskola Sekundária Jerál Nobel da Paz, Agustinho Pinto hatete, kazu sira ne’ebé sempre envolve husi estudante sira, antes ne'e husi parte eskola hasai ona sirkular ida hodi bandu estudante ba eskola lori pasta, tanba estudante balun nia pasta identifikadu katak fatuk no rama Ambon mak iha laran.

“Ita bandu sira labele utiliza pasta ba eskola tanba ita identifikadu ona sira uza pasta ne'e subar fali rama ambon, no fatuk iha laran, depois ba eskola sira hodi tuda malu, no ida ne'e akontese beibeik ba ita-nia estudante sira duni”, dehan nia.

Maibé dadaun ne'e parte eskola koopera ona ho polísia no husu atu koloka membru polísia iha eskola hodi bele kontrola estudante sira besik liu iha areadore eskola nia.

Ho esperansa prezensa polísia nian iha eskola hamutuk ho profesór eskola sira hodi bele halo prevensaun ba krime ne’ebé mak komete husi estudante sira.

Alende ne'e, husu ba inan aman sira atu kontrola no eduka oan iha uma, tanba inan aman mak ema primeiru ne'ebé hamutuk ho oan sira iha tempu naruk. (*)