“Bazeia ba dekretu lei No. 26/2021 iha artigu 18 ne’ebe publika iha Jornál Repúblika iha loron 26 novembru 2021, kona-ba funsionamentu postu fronteira terestre Mota-Ain, Salele no Sakato sei loke de’t iha loron segunda, tuku 9 dader to’o tuku 3 loro kraik bele sai husi territóriu nasional ba ema no sasán merkaduria. Enkuantu iha loron kuarta entre tuku 9 dader to’o tuku 3 loro kraik autoriza ema no sasán merkaduria husi nasaun seluk bele tama territóriu nasionál”, dehan nia iha pájina ofisial Ministériu Interior ne'ebé www.tempotimor.com asesu, segunda (28/11).
Dadauk pontu entrada husi nasaun seluk mai iha rai laran ne'e sei delega kompetensia tomak ba Ministériu Interior liuhusi Diresaun Jerál Servisu Migrasaun hodi autoriza ema tama iha territóriu tuir porsesu normál.
“Guvernu deside autoriza entrada no saida ba loron rua nia laran iha kada semana, maibé kuandu iha semana rua tolu mak situasaun komesa di’ak ona ita bele loke ona fronteira tuir prosesu normal hanesan baibain ita jere de’it mak tempu”, hatete nia.
Bazeia desizaun autorizasaun ne'e, sei iha diferensia no lahanesan tempu uluk ema tama mai territóriu nasional tenke hetan autorizasaun husi Sentru Integradu Jestaun ba Krize (SIJK).
Tanba ne'e, hahú ohin ba oin Governu sei aplika prosesu normal lei Migrasaun nian maibé nafatin loke dala-rua kada semana.
"Mesmu ita laiha ona Estadu Emerjénsia maibé ita nafatin hare dezenvolvimentu situasaun iha fronteira ho didi’ak tanba moras Covid-19 ne’e seidauk hotu no posibilidade bele mai ho variante foun iha kualker tempu. Entaun estratejia ne’ebé Ministériu Interior haree katak presiza nafatin prevensaun iha fronteira hodi diminui risku moras Covid-19 variante foun mai Timor-Leste”, afirma nia.
Maibé mós husu nafatin ba komunidade sira atu labele halo movimentu ilegál tanba postu fronteira tolu loke ona ba públiku.
“Pontu entrada loke ona tanba ne’e ba sidadaun sira hotu tenke tama tuir pontu entrada tolu ne’ebé Guvernu estabelese ona, labele tama tuir dalan ilegál tanba kontra lei migrasaun no sei aplika sansaun hodi selu multa, karik la selu sei lori ba Ministériu Públiku mak prosesa”, esplika nia. (*)
