"Autór ne'ebé envolve iha kazu konfrontu entre estudante ne’ebé akontese iha área SMA 4, nomós iha eskola Nobel da paz Bekora nia ne'e ita kaptura ona, ne'e estudante na’in-5,no ita-nia PNTL kaptura ida iha área Bekora nia, no na’in-haat  kaptura iha área Vera Cruz nia, prosesu kapturasaun ne’e akontese liuhusi atividade patrullamentu ne’ebé halo husi Polísia Eskuadra Cristo Rei no Vera Cruz bainhira sira buka tuir autór ba kazu konfrontu ne'e”, dehan komandante PNTL Munisípiu Dili, Superintendente Xefe Polísia, Henrique da Costa, iha Kaikoli, segunda (29/11).

Autór na’in-1 ne'ebé kaptura iha área Bekora nia ne'e, PNTL lori kedas ba edifísiu hodi halo prosesu, ne'ebé envolve mós profesór ida hetan kanek, no autór na’in-4 ne’ebé Polísia Patrollamentu Vera Cruz no forsa rezerva kaptura ne'e mós lori kedas ba eskuadra Vera Cruz ninian, hodi hala’o prosesu.

Aleinde ne'e, iha loron hirak liubá mosu mós insidente ne’ebé hanesan iha área Dom Aleixo, maibé polísia atende kedas ho lalais, no medida ne’ebé mak Komandu Díli halo mak komunika kedas ho parte estrutura eskola sira, hodi bele fó solusaun ruma ba insidente ne’ebé mosu iha eskola.

Nune'e mós Komandu Díli, fó ona orientasaun ba membru sira ne’ebé destakadu iha kada eskola hanesan Ofisiál Polísia Eskola (OPE), maske eskola balu seidauk iha, maibé patrullamentu sempre kobre

Entretantu Komandu Munisípiu Dili, nafatin husu ba estudante sira, atu aproveita oportunidade ho didi’ak hodi eskola, labele lori problema uma nian ba kahur iha aredór eskola nian. (*)