Tanba Komandante Daitula lakon iha funu laran hakarak atu liberta Povu no Rai Timor-Leste husi invazaun Indonézia ne’ebé oho Povu barak.
"Ne'e mak husu ba imi arte marsiál iha Baukau, saudozu Daitula lakon, la'ós imi atu mai muturabu, oho malu, baku malu tempu liu tiha ona, dala ruma sira uluk ne’ebé lakon oho malu ne'e mak sira agora oho malu fali ne'e. Ne'e mak ha’u husu ba imi joven Baukau, respeita imi-nia na’in uluk respeita imi-nia polísia, imi-nia forsa deféza, por ke sira iha ne'e ka'er lei no orden”, deklara Lere iha serimónia reflesaun Saudozu Daitula nia lakon fatin, Baukau, sábadu (27/11).
Tanba haree ba rai Baukau la'ós rai milisia no atu hamutuk fali ho Nasaun Indonézia, maibé Baukau mate ga moris defende nafatin ukun rasik-an.
"Ida ne'e mak sentru ba ita-nia Indepedénsia mós, Baukau la'ós rai milisia nian, Baukaula'ós rai atu hamutuk ho Indonézia, Baukau mate ga moris ukun rasik-an", dehan Lere.
Maibé, ikus-ikus ne'e, rona situasun iha Baukau komesa iha ona mosu ona violénsia, tanba komunidade sira ba asiste konsertu iha Darsula fila iha tempu kalan, ema balun asaltu iha dalan.
Ho situasaun ne’e, dala ruma autoridade sira mak ladun servisu maka’as, maibé Timor-Leste iha nia Polísia no F-FDTL atu haree hodi atua, maibe tauk viola direitu umanu labele halo buat ida.
Haree ba ema na'in-ida viola ema rihun ba rihun nia direitu di'ak, maibé autoridade seguransa no Defeza atu aperta de'it mós dehan viola nia direitu.
Maibé sidadaun ne’ebé hamosu instabilidade iha fatin balu PNTL no FDTL tenke atua hodi asegura komunidade sira seluk ne’ebé hakarak moris hakmatek.
"Ha'u hatete polísia no FDTL kumpri nia dever, se mak hakarak kria instabilidade halo komunidade la hakmatek, ka'er sira iha tereñu oin seluk, tama iha kadeia oin seluk, ha'u hanoin ne’e imi hatene ona, lalika hanorin ba imi", hatete Lere. (*)