“Konsellu Ministrus aprova projetu Dekretu-Lei ne’ebé aprezenta husi Ministru Defeza, Filomeno da Paixão de Jesus, kona-ba Estatutu Orgániku F-FDTL nian”, dehan Ministru Prezidénsia Konsellu Ministru, Fidelis Leite Magalhães, iha Palásiu Governu, kuarta (24/11).
Ho diploma ida-ne’e atu halo reforma orgánika Forsas Armadas nian permite atu fó resposta ida adekuada liuba dezafiu no misaun foun sira ne’ebé ezije resposta sira ne’ebé integrada liu hamutuk ho parseiru estratéjiku sira iha nível rejionál no mundiál.
“Diploma ne’e klarifika kompeténsia sira kona-ba ninia órgaun no servisu sira no promove atu hadi’a artikulasaun polítiku-militár nian relasiona ho Defeza Nasionál”, esplika nia.
Projetu Dekretu-Lei ne’e mós ho atu kompatibiliza orgánika F-FDTL nian la’os de’it ho kontestu legál atuál, hanesan, Lei Defeza Nasionál no Sistema Autoridade Marítima, maibé mós ho dokumentu estruturante lubun ida iha área Defeza nian, mak hanesan, Konseitu Estratéjiku Defeza no Seguransa Nasionál, Konseitu Estratéjiku Militár, Sistema Forsas Nasionál, Misaun Forsas Armadas no Dispozitivu F-FDTL nian. (*)
