"Ita-nia UPF sira iha fronteira kontinua halo kapturasaun ba sidadaun sira ne’ebé nafatin halo transasaun ilegál, relatóriu semanál husi Komandu PNTL hatudu katak, husi loron 19 mai to’o iha loron 23 fulan-Novembru 2021, UPF kontinua halo detensaun no kapturasaun ba autór sira ne’ebé envolve iha atividade tranzasaun ilegál”, dehan Portavóz Komandu PNTL, Superintendente Xefe Arnaldo de Araújo, iha Kuartél Jerál PNTL, Kaikoli, kuarta (24/11).
Tanba iha loron 19 fulan-novembru 2021, tuku 10:30 oras timor-leste, Komandu PNTL Munisípiu Bobonaro, halo atuasaun ba sasán ne’ebé mak konsidera kontra bandu mak hanesan kilat-anin modelu sharp tiger lolon ualu (8) ho fugetis kaixa tolu (3), inklui detein mós suspeitu ho inisiál DT ho tinan 40,iha área Tunubibi.
Dadaun ne'e suspeitu ho sasán sira-ne’e, iha ona komandu Maliana hodi submete ba Ministériu Públiku.
Aleinde ne'e mós, iha tuku 12 kalan, loron 23 fulan-novembru, liuhusi atividade pasa-revista, Komandu UPF konsege identifika tan ema na’in-2 ne’ebé mak utiliza motorizada rua (2) hodi ba foti sasán ne’ebé haruka husi Indonézia mai Timor-Leste.
"Ita kaptura tan Sidadun na’in-2, tanba sira rua ba foti sasán ka atributu arte marsiál nian ho nia par hamutuk 145 iha mota sorin ba”, informa nia.
Entretantu Sidadaun na’in-2 ne'e komandu UPF halo hela identifikasaun, hodi entrega ba komandu Munisípiu Bobonaro. (*)