"Husu ba komunidade ne'ebé iha fronteira atu hapara importasaun kilat-anin tanba ne'e sei lori ameasa ba nasaun no povu nia moris. Ita tenke kumpri ba ita-nia regra hothotu, servisu hamutuk ho ita-nia seguransa sira, no ita mak tenke iha konsiénsia rasik katak ida ne’ebé mak ita halo ho dalan ilegál ne’e ladún di’ak”, dehan António Armindo, iha edifisiu MI Kaikoli, segunda(22/11).
Tanba ne’e, Timoroan presiza hadomi ninia nasaun hodi tane aas dignidade no soberania nasaun niann. No husu ba sidadaun hotu atu obedese ba regulamentu ne'ebé iha ona.
Maibé iha loron sábadu (20/11) ne'e, Komandu PNTL Munisípiu Bobonaro, husi ekipa Alfa Forsa Rezerva, halo apreensaun ba kilat-anin ho marka “Sharap Tiger” hamutuk ualu (8) inklui fugetis hamutuk kaixa tolu, ne’ebé tula ho mikrolete iha área Tunubibi, Munisipiu Bobonaro.
Tanba iha rezolusaun Governu nian, iha lei númeru 05/2017, bandu sidadaun utiliza atributu arte marsiál ho arma branka.
Tanba ne’e sidadaun sé de’it mak viola norma legál hirak ne’e, Polísia Nasionál Timor-Leste (PNTL) liuhusi Unidade Patrullamentu Fronteira (UPF) sei halo detensaun no kapturasaun hodi submete ba investigasaun. (*)