"Ha'u hanoin kursu promosaun ba ofisiàl inspetór ida ne'e nu'udar, planu Komandu Polísia Nasionàl Timor-Leste atu hahú aporta ba kualidade rekursu umanu iha Institusaun PNTL”, dehan Komandante Jeràl PNTL, Komisáriu Faustino da Costa, iha Komoro, segunda(15/11).
Tanba ne'e, parte Komandu PNTL husu ba kandidatu sira atu aproveita oportunidade ne'e ho di’ak nune'e bele pasa iha kursu regere.
"Ha'u husu ba ita-boot sira tenke aproveita didi’ak oportunidade ida ne'e kursu ida importante atu sukat ita sira kualidade. Tanba kualidade ne'e mai husi ita idak-idak, tanba ne'e mak imi nafatin hatudu atetude ne'ebé di’ak durante formasaun nune'e bele iha kursu ida ne'e, tanba depois de formasaun kursu ne'e sei iha promosaun deviza ba membru PNTL na’in-34 ba postu asistente Inspetór”, informa Komisáriu Faustino da Costa.
Komandante Sentru Formasaun Polisia (CFP), Superientidente Xefe Arquimino Ramos hatete, formasaun Kursu Promosaun Inspetór ne'e halo ba membru PNTL na’in-34 ne'e bazeia por estraordinária.
"Sira ne'e tuir kursu ohin tuir em nain- 35, maibé Iia tanba kondisaun saúde nia rezigna-an entaun hela de’it na’in-34 mak tuir kursu ne'e", afirma nia.
Husi membru hirak ne’ebé tuir formasaun maioria husi deviza Sejentu, Primeiru Serjentu no Serjentu Xefe.
" Sira ne'e maioria membru ne'ebé iha ona esperiénsia komanda Unidade sira iha PNTL uluk hanesan iha Unidade Intervensaun Rápida (UIR), Komandante Eskuanda sira husi Munisípiu balun no departementu sira iha Komandu PNTL”, dehan Arquimino.
Formadu sira ne'e esperiénsia komanda iha ona, liuhusi formasaun ne'e atu aprofunda de’it sira-nia koñesementu kona-ba teoria. Teoria ne'ebé ita fó iha formasaun mak jestaun no oinsá politika hamosu hanoin inovativa nune'e dezemvolve institusaun, disipliña no oinsá hatene liután iha parte juridiku", dehan Komadante Arquimino.
Ba formasaun ne'e aprende teoria iha mós prátika treinu fisiku sei hala’o iha Rairobo, Postu Administrativu Atabae, Munisípiu Bobonaro.
Entertantu Kursu Promosaun Ofisiàl Inspetór ne'e mane 30 no feto iha na’in-haat. (*)