Suspeitu PNTL kaptura horseik (07/11) parte kalan ne’ebé ho inisiál DSF no submete ona ba prosesu identifikasaun.

Kazu ne'e akontese iha loron sesta 05 fulan-novembru tinan 2021 iha parte loraik, bainhira karreta bus tula pasajeirus husi Munisípiu Vikeke ba Dili ne’ebé hetan atake iha dalan área semitériu Suku Gariuai.

Komandu PNTL Munisípiu Baukau Superitendente Asistente, José Casemero informa, servisu sekreta konsege kaptura suspeitu ne’e, iha nia rezidensia maizoumenus tuku 2 madrugada oras timor-leste no entrega ona ba Servisu Seksaun Kriminál atu aprezenta ba Ministériu Públiku hodi  halo indentifikasaun no dadaun aplika Termu Indentidade Rezidénsia (TIR) ba suspeitu DSF.

"Ligadu ho kazu ne'ebé virál iha média sosiál, ita nia esforsu tomak hodikalan ita nia servisu sekreta J2 konsege lori ona suspeitu ida mai submete ba prosesu identifikasaun", nia informa ba media sira iha nia kna'ar fatin, segunda (08/11).

Kronolojia husi akontesementu ne'e parte PNTL Munisípiu Baukau seida'uk simu keixa husi motorista ne'ebé konduz karreta, maibé hanesan servisu PNTL foti ba kazu refere.

Komadante ne'e esplika, kazu refere virál ona iha media sosiál no ema hotu haree realidade iha ema na’in-4, maibé dadaun halo uluk ona identifikasaun ba suspeitu na’in ida, enkuantu na’in-3 seluk kontinua hein orientasaun husi MP bainhira hetan mós informasaun husi motorista no ajudante ne'ebé hetan asaltu iha loron sabadu.

Nia dehan, bainhira suspeitu DSF halo identifikasaun remata sei halo mós konfirmasaun ho parte motorista ne'ebé konduz karreta atu marka prezensa iha komandu PNTL Munisípiu Baukau hodi hato'o mós informasaun.

"Ida ne'ebé agora ita identifika ne'e ida ne'ebé halai tuir lori katana ga aidona baku ajudante ne'e, ida ne'e mak agora ita halo identifikasaun no mós orientasaun Ministéiru Públiku ita aplika ona TIR", dehan nia. (*)