"Sosializasaun ne'e ami halo bebeik ona mais komu ema mak ulun fatuk to'os kontinua halo nafatin entaun rekursu ikus liu maka ami tenke liuhusi ekipa forte ida husi Ministériu relevante hodi bandu ema labele halo tan uma iha ne'ebá”, dehan Eurico de Jesus ba www.tempotimor.com iha nia servisu fatin Komoro, kinta (04/11).
Antes ne'e Autoridade lokál hamutuk ho Ministériu relevante sira hasai ona haruka desizaun tau komunidade sira buka fatin no labele hela iha fatin risku sira hodi labele akontese dezastre ba.
"Akontesimentu ida 4 de Abríl ne'e foun ikus nian, mais uluk ne'e ami hasai sira iha dalan ninin ne'e bandu sira atu labele halo uma iha mota ninin maibé kontinua halo nafatin”, afirma nia.
Iha dekretu lei númeru 33 IGE lei ordem públika tenke halo uma dook husi mota ho metru 25 to'o metru 50 no labele taka dalan natureza mota nian.
"Populasaun suku Komoro liliu iha aldeia 12 de Outubru, Moris foun, 30 de Agostu, no aldeia Fomentu 1 2 3 sira hirak ne'e barak mak mota lori sira nia sasan nune'e dadaun ne'e halo levantamentu hasai ona sira nia naran buat hotu bandu maibé sira kontinua halo nafatin”, hatete nia.
Hafoin akontesimentu inudasaun iha Munisípiu Díli Governu deside atu kria bairu foun ba sira maibé to'o agora seidauk realiza.
Komunidade vítima sira balun kontinua iha lona okos, iha alojamenntu sira no no komunidade balun kontinua akupa eskola balun tanba Governu seidauk kria fatin dignu ida ba sira.
Iha fatin identifikasadu sira ne'ebé mak halo bairu foun ba komunidade sira mak iha Hera, Beduku no Tibar, maibé Governu seidauk kria fatin ba komunidade vítima sira. (*)