Print this page

Konsellu Suku Saburai Oferese Rai ba UPF Konstrui Postu Vijilánsia

By October 22, 2021 846
Konsellu Suku Saburai hamutuk ho komandante UPF haree hela rai ne’ebé entrega. Konsellu Suku Saburai hamutuk ho komandante UPF haree hela rai ne’ebé entrega. Foto Suplay

Tempotimor (Dili)-Konsellu Suku Saburai, Postu Administrativu Maliana, Munisípiu Bobonaru ho inisiativa entrega rai ba Polísia Nasionál Timor-Leste (PNTL) liuhusi Unidade Polísia Fronteira (UPF) atubele konstrui postu vijilánsia.

"Ohin, kinta (21/10), Konsellu Suku no reprezentante lia-na’in suku Saburai, deside hamutuk, hodi fó fatin ka rai mamuk ba Unidade Polísia Fronteira (UPF), hodi konstrui postu vijilánsia atu asegura seguransa iha liña fronteira, espesialmente komunidade suku Saburai nomós ba ita-nian rai doben Timor-Leste”, informa Komandante UPF, Superintendente Euclides Belo, liuhusi karta ne'ebé www.tempotimor.com asesu, sesta (22/10).

Medida rai ne'ebé komúnidade ho autóridade lokál entrega ba UPF  ho metru kuadradu 50×50 iha área Lorilolo, aldeia Mabiloka, Suku Saburai, Postu Administrativu Maliana, Munisípiu Bobonaru.

Dadaun ne'e Governu liuhusi Ministériu Interior (MI) ho apoiu parseira sira konstrui ona postu hamutuk 30-resin liuhusi investimentu fundu Covid-19 no orsamentu tinan 2021.

Espera ho aumenta númeru postu sira iha fronteira terreste atubele minimiza númeru pasajen ilegál. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items