Print this page

SFKV Sei Apoiu Projetu Sistema Alerta Sedu ba TL

By October 14, 2021 829
Sekretáriu Estadu Ambiénte (SEA), Demetrio do Amaral de Carvalho, Sekretáriu Estadu Ambiénte (SEA), Demetrio do Amaral de Carvalho, Foto Suplay

Tempotimor (Dili)-Sekretáriadu Fundu Klimátika Verde (SFKV) deside sei apoiu projetu ho títulu hadi'a (mellora) Sistema Alerta Sedu hodi reziliente liután hasoru perigu sira husi hidro-meteorolojiku ba Timor-Leste (TL).

Sekretáriu Estadu Ambiénte (SEA), Demetrio do Amaral de Carvalho hatete, projetu ne'ebé sei oferese ba TL ne'e hetan ona aprovasaun husi Fundu Klimatika Verde iha enkontru konselu ezekutivu FKV nian ba dala 30, loron 7 fulan-Outubru 2021.

“Atu pronunsia Timor-Leste nia projetu ida importante la halimar, ne'ebé foin hetan aprovasaun husi Fundu Klimátika Verde (FKV), ba hasa'e Timor-Leste ninia rejilénsia hasoru dezastre, hanesan ita-nia esperénsia dia 4 de abri, hatudu mai ita, ita-nia vulneralbilidade, hodi halo alerta sedu, tanba ne'e efeitu sira ne'ebé ita enfrenta boot tebtebes”, dehan nia iha Ótel Novu Turizmu, Lesidere, kinta (14/10).

Tanba, Timor-Leste hanesan nasaun ne'ebé tama iha kategoria menus dezenvolvidu (LDC) ho nasaun illa ki'ik mak foin dezenvolve (SIDCs), ne'ebé sei la ses husi dezastre, liliu hanesan dezastre loron 4 abril 2021, ne'ebé hamate ema, ema kanek, lakon, refujia, estraga sasán, fasilidade no impaktu ba sosio-ekonomia sira-seluk.

Iha situasaun ne'e, Timor-Leste iha oportunidade no iha direitu atu asesu ba Fundu Klimatika Verde (FKV), tanba bazeia ba kategória vulneravel.

Tuir kritériu ne'ebé iha, katak nasaun ne'ebé atu asesu ba FKV ne'e, mandatoriamente hari'i uluk lai Autoridade Nasionál Dezignada (AND).

Maibé, dadaun ne'e Timor-Leste iha ona AND iha Sekretáriu Estadu Ambiente (SEA) nia mahon ne'ebé konsege hasai karta ‘no-objection' United Nations Environmental Programme (UNEP) hodi FKV kosenge aprova duni projetu importante iha área adaptasaun klimátika nian.

Totál orsamentu ne'ebé sei aloka ba projetu ne'e hamutuk tokon US$21.7 (Grants) husi FKV. Totál benefisiáriu husi projetu ne’e mak tokon 1.3 populasaun TL (benefisiáriu direita ema 1.034.495 (80%) no indireita 258.624).

Objetivu prinsipál husi Projetu ne'e, hasa'e moris di'ak no melora reziliensia hasoru mudansa klimátika no perígu sira husi mudansa klimátika liga ba setór sira hanesan saúde, agrikultura, redusaun risku dizastre, jestaun ba bee no ambiénte no komunidade sira iha TL, liliu evita ema mate, estragu ba sasán, ekonomia husi impaktu extrema durante mosu dezastre.

Iha Projetu UNEP nian ne'e, SEA liuhusi Autoridade Nasionál Dezignada konsege asegura ona totál orsamentu husi FKV ba Timor-Leste desde 2019, hamutuk kuaze US$55574,308.

Projetu sira ne'e agora iha faze implementasaun nia laran, no fundu ba kapasitasaun (readiness) nian agora dadaun iha (pipeline) ka prosesu nia laran atu aprova ba oin rua ho montante osan hamutuk US$999,889. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items