Iha akontesimentu ne’e, rezulta Xineza na'in-ida kanek gráve no oras ne’e baixa hela iha Hospital Nacional Guido Valadáres (HNGV) no ida seluk polísia detein hela iha sela detensaun eskuadra Dom Aleixo.
"Ohin (12/10), dadeer mós iha akontesimentu insidente ida iha área Hudi Laran, iha Timor Foun ninian, iha sidadaun estranjeiru na'in-2 husi Xina hotu, ne'ebé mak komete iha ta-malu, e ita-nia parte patrulla lori kedas ba eskuadra e suspeitu agora detein iha sela detensaun Dom Aleixo nian e vítima lori kedas ba Ospital nasionál hodi hetan tratamentu, e vítima agora bele fila ona, mais hetan suku pontu 13", informa Komandante PNTL Munisípiu Dili, Superindente Xefe Henrique da Costa, iha komandu Kaikoli, tersa (12/10).
Motivu husi insidente ne'e, tanba deskonfia vítima ho suspeitu hemu tua-lanu, durante atividade kanta halimar (karaoke), ikus mai, rezultadu to'o hakanek malu.
“Iha tempu kalan sira lanu, e dala-ruma tanba sira karaoke, buat sira ne'e hotu, depois sira lanu mak hodi uza sasán kroat, katana ta-malu. Suspeitu ho vitima ne'e, na'in-rua Xineza hotu”, esplika nia.
Ho akontesimentu asasinatu ne'e, PNTL liuhusi Servisu Investigasaun Kriminál, hala'o ona komunikasaun ho prokuradór, atu nune'e prosesu bele la'o iha ministériu públiku ho di'ak. (*)