"Se ita hakarak Amu Papa mai Timor, ema sarani Timor ne'e tenke vasina hotu entre Setembru-Outubro 2022 Amu Papa sei mai”, dehan Elizário Ferreira bainhira halo kampaña vasinasaun iha Suku Atara, Postu Administrativu Atsabe, Munisípiu Ermera segunda (11/10).

Bazeia ba vizita líder Igreja Katólika mai Timor-Leste, amu Bispu Dom Norberto ba halo kampaña vasinasaun iha Munisípiu Ermera hodi enkoraza sidadaun sira simu vasina.

"Tanba ne'e amu Bispu mai Eremra halo kampaña Vasinasaun iha Ermera ne'e para amu Papa atu mai karik, Amu Papa nia ezijénsia ne'e iha Timor ne'e tenke iha pursentu 90 (90%) vasina”, hatuta nia.

Tanba dadaun ne'e vasina menus liu iha Munisípiu Eremra, mak ne'e husu sidadaun hotu atubele simu vasina hodi nune'e to'o tempu Amu Papa mai halo vizita iha Timor-Leste tuir nia promesa amu Papa ho kontente.

Pesoál Saúde iha Suku Atara,Domingas Goncalves hatete, dadaun ne'e Komunidade iha Suku Atara simu vasina primeira doze atinje ona pursentu 37 no segundu vasina foin atinje pursentu hitu (7).

"Iha ne'e iha totál populasaun iha Suku Atara hamutuk 1.572 iha ne'e ami fó vasina primeira doze atinje pursentu 32 (32%) no segundu doze iha sete pursentu (7%) iha suku Atara nian”, dehan nia.

Maibé la konta hamutuk ho sidadaun sira ne'ebé simu vasina iha Munisípiu Dili tanba dala barak lista iha Suku iha hela maibé sidadaun sira ba simu vasina ona iha fatin seluk.

"Tuir lista dehan katak komunidade barak mak la vasina maibé loloos ne'e sira barak mak simu ona vasina iha Díli maibé haree ba lista iha ne'e ita hare sira menus tanba la tama ona ne'ebé ami prense”, esplika nia.

Nune'e kutun Komunidade sira iha Suku Atara iha Vontade maibé difikuldade mak menus informasaun kona-ba vasina Covid-19 nian.

Haree ba vontade sira menus tebes tanba ne'e mak totál vasinadu iha Ermera menus ka laiha koñesimentu kona-ba ida ne'e ka la hetan informasaun.

“Ami Pesoál saúde sempre fó sosializasaun no promosaun kona-ba vasina ne'e di'ak ba ita, maibé iha inan aman barak ne'e mak rona liuba informasaun falsa”, dehan nia.

Difikuldade iha terenu ne'ebé Pesoál saúde sira hasoru mak laiha ekipamntu báziku sira maibé iha máskara de'it. (*)