"Tuir ami-nia haree katak, ita sei menus formasaun ba membru sira ne'e, tanba ita haree formasaun sira ne'ebé fó ne'e, hahú husi formasaun báziku, depois de sai hanesan kadete, tama sentru formasaun, sira simu formasaun ne'e, sé la sala agora fulan neen, uluk ba fulan tolu ba fulan sia, depois mai fali fulan neen. Ida ne'e mós depois de sira simu tiha formasaun, formasaun kontinua ne'e mak sei menus, entaun dala ruma mós bele implika ba sira-nia koñesimentu”, dehan Peskizadór FM, Sancho Pires, iha kna'ar fatin, Suku Gricenfor, segunda (11/10).

Iha mós problema seluk ne'ebé liga ho kondisaun membru sira-nian, tanba laiha formasaun kontinua, nune'e sira seidauk sensível ho lei sira ne'ebé iha, kona-bá atuasaun uza forsa.

“Dala-barak sira kuandu tun ba terrenu ne'e, sira sempre hakat sala. Dala-ruma iha lei no ordém mós ladun hanesan, pur ezemplu, tanba sira laiha koñesimentu ne'ebé di'ak, entaun komandu ida ko’alia katak, ita ba halo atuasaun, ou dala-ruma sira-nia statement ne'e obriga ema halo infrasaun dixiplinar la ho regra formal ruma”, dehan nia.

Tanba ne'e, membru sira halo atuasaun ba kazu ruma, tenke komprende uluk filozófia PNTL ne'e rasik, tanba karáter PNTL nian mak polisiamentu komunitáriu, katak aprosimasaun ba problema ruma ne'ebé akontese la'os uza fíziku.

"Ita bele ko’alia, ita bele oinsá, karik ita lori vítima ho suspeitu sira, ita lori prosesu ne'e ba oin. La'ós ita uza forsa atubele rezolve problema ida ne'e. Agora, sé ida ne'e liga mós ho formasaun selseluk, formasaun sira disiplinar mós, oinsá sira bele komprende lala'ok sira husi polísia ne'e rasik, liliu iha lei dixiplinar nian", afirma nia.

Bainhira lei disiplinar membru PNTL hotu hatene, sira sei komprende, oinsá atubele halo atuasaun ruma sei tuir koñesimentu. (*)