"Sensibilizasaun ba loron ohin ne'e importante teb-tebes ba estudante sira. Primeiru, sira maka sai hanesan autór oinsá para lori dezenvolvimentu ba sosiedade sira. Entaun, saida mak tenke ser hatene husi ne'e, entaun ami mós aprezenta matadalan ida ne'ebé mak hosi ami-nian atu hato'o ba sira para komprende didi'ak, oinsá sira bele uza ho sira-nia referénsia atu dezenvolve tan de'it. Entaun, liga ho ami-nia matadalan ohin ne'e mak, matadalan ne'ebé mak sensível ba jéneru", dehan Diretór DNPKK, António Viegas, iha Salaun Luz Clarita, Suku Gricenfor, segunda (11/10).
Matadalan kona-bá sensível ba jéneru ne'e rasik, hetan aprovasaun husi Primeiru Ministru (PM), Taur Matan Ruak, atu DNPKK bele fahe informasaun hirak ne'e ba universitáriu sira no komunidade sira bele koñese.
Analista Programa Feto, Pás no Seguransa-UNWoman, Leonesia Tecla da Silva hatete, UNWoman parseria ho MI, liliu SEPS, liuhusi DNPKK, no kuaze tinan sanulu-resin ona.
"Buat ne'ebé mak UNWoman hakarak hametin liután sira-nian kooperasaun hamutuk ho sira mak liga ba atu institusionaliza matadalan mediasaun sensível ba jéneru e foka mós ba dezenvolvimentu planu 1325, rezolusaun konsellu seguransa nasaun unidas nian iha Timor-Leste, kona-bá feto pás no seguransa”, afirma nia.
Kona-bá matadalan ba sensível ba jéneru ba estudante sira ne'e, tanba dala-barak estudante sira halo sira-nia papél hanesan akademista, nune'e ema hotu hanoin hela katak estudante sira mós iha kbi'it no abilidade atubele fasilita no fó apoiu ba líder komunitáriu sira iha prevensaun no rezolusaun konflitu.
"Ami hanoin hela katak matadalan sensível ba jéneru ne'e di'ak ba líder komunitáriu sira iha prevensaun no rezolusaun konflitu. Entaun ami haree katak, matadalan ida ne'e di'ak ba estudante sira atu sira bele iha koñesimentu oitoan, oinsá atubele hakbi'it papél mediadóra sira atu aumenta sira-nia partisipasaun hanesan mediadór nomós partsipante feto sira iha rezolusaun konflitu nian, e mós sira ne'ebé vulnerável tebes", hatete nia.
Estudante sira ne'ebé partisipa iha sensibilizasaun ne'e, reprezenta husi Universidade Nasional Timor-Lorosa'e (UNTL), Universidade Orientál Timor-Lorosa'e (UNITAL), Universidade de Dili (UNDIL), no Universidade da Paz (UNPAZ), hamutuk ema na'in-20. (*)
