"Ha'u hanoin, seidauk di'ak. Seidauk di'ak tanba saida?. Tanba durante ne'e ita haree, ita iha ona lei, ita iha ona sistema. Primeiru mak dekretu lei kona-bá rejime juríku uza arma ninian, lei númeru 43/2011, ne'ebé nia ko’alia kona-ba ida ne'e, oinsá atubele hatuur, oinsá bele uza kilat, kontrolu no rai kilat ninian”, dehan Peskizadór FM, Sancho Xavier, iha kna'ar fatin Suku Gricenfor, tersa (05/10).

Tanba komandu PNTL rasik mós iha ona Norma Organizasaun Prosedimentu (NOP), ne'ebé introduz husi dekretu lei númeru 43/2011 ne'e rasik, liliu liga ho uza arma, rai no kontrolu ninian.

"Mais durante ne'e iha problema ne'ebé ita identifika mak kontrolu ne’e rasik. Kontrolu ne'e sei iha problema. Purke oinsá atubele hasai arma no hatama arma sira ne'ebé pesoál sira bele uza iha terrenu ne'e, sei iha difikuldade boot", hatete nia.

Aleinde ida ne'e mós, kondisaun sira, tanba iha norma ne'e rasik hatete katak, presiza iha armóriu ba kilat PNTL nian, atubele utiliza arma (kilat) sira iha de'it tempu servisu.

"Kuandu ema sira ne'ebé uza fora de oras servisu ne'e, presiza hetan autorizasaun. Mais durante ne'e ita haree, no kilat sira ne'e tenke rai iha armóriu ne'ebé estabelese iha komandu, iha Munisípiu ho iha eskuadra sira. Durante ne'e, kondisaun ida ne'e laiha. Entaun, dalaruma kilat sira sempre lori, dala-ruma kondisaun ladi'ak, la seguru. Entaun, dala-ruma ida ne’e mós difikuldade ida ba servisu PNTL ninian", haktenik nia.

Nune'e mak, dala-ruma kazu balu akontese envolve husi membru PNTL sira, maibé ida ne'e sai dezafiu ida ba sira atu utiliza fali kilat ho arbiru.

"Lei ne'e rasik mós bandu, kilat ne'e uza bainhira iha nesesidade ou ka iha nesesáriu duni atu uza arma ne'e mak, sira bele uza. La'ós kilat ne'ebé ita iha ne'e, ita uza arbiru la’e"’ afirma nia. .(*)