“Temporáriu iha sentru alokasaun sira ne'e família hamutuk 135, família 69 mak hakarak konkorda fila ba sira-nia rain, iha 68 mak sai halo nafatin lona okos”, dehan Joaquim ba Jornalista hafoin reuniaun ho Primeiru Ministru (PM), Taur Matan Ruak, iha nia Rezidénsia Faról segunda (04/10).
Vítima sira ne'e barak mak mai husi Munisípiu Baukau, Rejiaun Autónoma Espesiál Oekussi Ambeno (RAEOA), no iha mós vítima balun mak família sira akomoda sira no prepara fatin oituan ba komunidade afeitadu sira ne'e.
Família sira ne'ebé mak konkorda hakarak fila ba uma no hakarak hela ho família iha balun ne'ebé hakarak fila ba Munisípiu Sekretáriu Estadu Protesaun Sivíl fó apoiu konstrusaun no sasán balun transporte atu nune'e bele to'o sira-nia fatin.
“Hakarak atu fó hatene de'it katak meius di'ak liu mak protesaun Sivíl opta ba atu hela iha fatin apropriadu no dook husi fatin risku dezastre tanba ida ne'e mak ita prepara hamutuk iha fatin di'ak ida no dadaun ne'e meius ne'ebé di'ak mak prepara alojamentu temporáriu ba sira tanba obsaun ne'e lei fó dalan hela”, informa nia.
Kona-ba identifikasaun rai ba sidadaun sira ne'e prontu atu kontribui prepara rai iha no hein iha Sekretáriu Estadu Terras no Propriedade.
Antes ne'e, Ministru Justisa (MJ), Manuel Cárceres hatete, Sekretáriu Estadu Terras Propriedade prontu atu fó rai ba sidadaun afeitadu sira ne'ebé akontese iha loron 4 fulan-abríl liubá.
"Parte Justisa ne'e rai iha hela ita identifika fatin tolu, mak ida iha Hera nian ne'e prepara ba sidadaun Leste sira, iha Beduku dalan ba Aileu sira ne'e ita prepara ba rai klaran sira no Tibar mak ita prepara ba Oeste maibé koloka ema hanesan ne'e. Tuir ha'u-nia hanoin de'it maibé mai mak ministériu sira deside hamutuk”, dehan Manuel Cárceres. (*)