Print this page

SM Rezeita FM Akuza MI Politiza Nomeasaun Adidu Seguransa

By September 29, 2021 1608
Diretór Jerál Servisu Migrasaun (SM), Superintendente Asistente, Luis Barreto. Diretór Jerál Servisu Migrasaun (SM), Superintendente Asistente, Luis Barreto. Foto Suplay

Tempotimor (Dili)-Ministériu Interior (MI) liuhusi Diretór Jerál Servisu Migrasaun (SM), Superintendente Asistente, Luis Barreto, rejeita akuzasaun husi Fundasaun Mahein (FM) ne’ebé deklara MInisteriu Interior liliu Vise Ministru Interior politiza nomeasaun adidu seguransa ba rai liur.

Tanba nomeasaun ba adidu migrasaun ne’e, proposta husi Diresaun Jerál Servisu Migrasaun rasik mak halo, hodi aprezenta ba Ministériu atubele halo aprovasaun.

“Ho oportunidade ida ne’e ha'u hanesan Diretór Jerál Migrasaun hakarak deklara ba públiku katak foin dadaun iha informasaun balu husi ita-nia belun sira husi Fundasaun Mahein ko’alia kona-ba nomeasaun adidu Migrasaun. Iha ne’e hau atu informa katak prosesu nomeasaun ba adidu sira ne’e proposta husi Diresaun Jerál Servisu Migrasaun mak eskolla depois sei hetan aprovasaun husi Ministériu Interior”, esplika Luis Barreto, liuhusi komunikadu ne'ebé www.tempotimor.com asesu, kuarta (29/09).

Mudansa kona-ba kargu iha instituisaun ida halo parte integrante husi polítika reorganizasaun estratejia instituisaun nian, hodi fó atensaun ba objetivu institusionál, tanba ne'e buat normál ida, inklui hanesan mós meius ida atu haburas oportunidade atu promove kapasidade membru sira iha instituisaun nia laran la haree ba kór.

“Adidu sira ne’ebé mak propoin maioria membru Polísia no balu funsionáriu sivíl ne’ebé mak servisu ona iha migrasaun tinan barak nia laran no sira-nia pozisaun ho grau lahanesan”, dehan nia.

Tanba iha balu adidu no balu hanesan ofisiál ligasaun ka tékniku administrativu ofisiál ligasaun Migrasaun nian hodi halo kna’ar sira hanesan halo koordenasaun no kooperasaun iha dominiu servisu migrasaun nian nomós halo protesaun ba sidadaun timoroan sira iha asuntu sidadania nian inklui fó asisténsia iha prosesu judisiária ne’ebé presiza tratamentu espesiál.

“Ba maluk sira ne’ebe mak hanoin bot atu hadia migrasaun hodi implementa lei ho di'ak, ha’u husu ba maluk sira bele mai ami-nia fatin hodi konfirma ba informasaun ne’ebé mak los sela’e publikasaun sira hanesan ne’e bele fó risku ba membru sira lagosta malu no harahun institusaun Estadu ida ne’e nian”, afirma nia.

Iha loron segunda (27/09), Diretór Ezekutivu Fundasaun Mahein, João Almeidia hatete, FM identifika Vise Ministru Interior kontinua intervein no nomeia ema la tuir méritu no koñesimentu iha servisu migrasaun ninian hodi prienxe vaga ba adidu iha Portugal, Singapura, Darwin-Austrália, iha Indonézia hanesan Konsuladu Bali, Kupang, no Atambua nian.

"Husi fatin hirak ne'e, Vise Ministru Interior, halo nomeiasaun ba adidu migrasaun, liliu ajente sira ne'ebé nomeia ba adidu, hanesan adidu ba migrasaun ninia, laiha kursu ruma, laiha koñesimentu e iróniku liután ema ne'ebé foun, e balu ne'ebé komete ona krime iha tinan kotuk, Ministru Interior Interinu, Filomino da Paixăo de Jesus, halo ona medida sira, ou regra sira dixiplinar nian, no hasai ona husi servisu migrasaun, maibé Vise Minisru Interior, kontinua nomeia ba adidu migrasaun ninian”,  dehan nia. (*)

Rate this item
(0 votes)
Last modified on Wednesday, 29 September 2021 16:21
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items