Print this page

PNTL Detein Suspeitu CJBM ba Kazu Tentativa Omesídiu

By September 24, 2021 2023
Portavoz Komandu PNTL, Superintendente Xefe Arnaldo de Araújo. Portavoz Komandu PNTL, Superintendente Xefe Arnaldo de Araújo. Foto Suplay

Tempotimor (Dili)-Polísia Nasionál Timor-Leste (PNTL) liuhusi komandu Munisípiu Baukau, detein ona sidadaun mane ida Sela polisia, tanba konsidera sai suspeitu ba kazu tentativa omesídiu ho kilat anin, hasoru labarik minoridade ida iha Postu Administrativu Kelikai, Munisípiu Baukau.

"Hakarak hatete katak, iha sábadu 18 de Setembru 2021, oras tuku 09:11, kazu tentativa omesídiu ida iha Postu Administrativu Kelikai, Munisípiu Baukau, suspeitu ho naran CJBM, nia lori kilat anin, nia tiru ba vítima ho naran Miguel M. Martins, tinan 10, iha nia kabun. Motivu nia tiru ne'e seidauk hatene, tanba deskuidu ka ou nia mak hakarak tiru duni ka, ida ne'e mak seidauk hatene. Nia prosesu oras ne'e dadauk la'o hela e suspeitu ne'e agora dadauk, polísia detein hela nia", informa Portavoz Komandu PNTL, Superintendente Xefe Arnaldo de Araújo, iha komandu Jerál Kaikoli, sesta (24/09).

Hafoin akontesimentu ne'e, família sira evakua kedas vítima ba halo tratamentu iha Ospitál Referál Eduardo Ximenes Baukau.

"Ha'u hanoin, bala musan tama ba nia kabun, entaun presiza tenke halo operasaun ou ne'e depende ba médiku sira halo observasaun", dehan nia.

Bainhira husu kona-ba modelu ka tipu husi kilat anin ne'e mak oinsá, no ho distansia hira mak suspeitu tiru, nia la hatete klaru, maibé iha kilat anin ida ne'ebé dala-ruma suspeitu uza hodi ba kasa ka dala-ruma atu hadi'a, maibé prosesu ne'e sei iha hela investigasaun laran.

"Entaun, vítima ne'e sei moras hela iha Ospitál hodi halo tratamentu, depois de tratamentu hotu mak polísia foin bele husu ba vítima ho nia familia”, dehan Arnaldo. (*)

Rate this item
(2 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items