Kandidatu foun ne'e, komisaun rekrutamentu deside halo demisaun, bainhira halo aprezentasaun-an ba komandu Falintil-FDTL, iha kampu futsal, kuartel jenerál Fatuhada, Dili.
"Ida ohin mete artes marsiál, mais la deklara-an. Nunka deklara iha formuláriu dehan nia ne'e envolve iha arte marsiál. Ami konsisténte buat ne'ebé ami hatete. Onestidade importante. Sé ó envolve iha arte marsiál o tenke ser hatete. O deklara aan ne'e, não vale a pena. Ne'e point boot ida ba nia. Mais kuandu ó mete hela arte marsiál la deklara, hatudu mai katak sá, ó tama forsa mais oras ida ó fila, ó sei hadomi nafatin ó nia organizasaun. Tama forsa para sivíl, la'ós tama forsa atu envolve fali arte marsiál. Ne'e forsa hakribi ba ida ne'e", hatete Tékniku Komisaun Rekrutamentu 2021, Kapitaun Infantária, Rui Soares, iha kuartel jenerál Fatuhada, Dili, kuarta (22/09).
Desizaun ne'e, Komandu Falintil-FDTL hasai, la'ós tanba hakribi ba organizasaun arte marsiál, maibé atu eduka membru sira servi de'it povu ho nasaun Timor-Leste.
"Ami nunka koondena ou hakribi organizasaun artes marsiál. Organizasaun di'ak, mais kuandu tama ona forsa, hakribi organizasaun, servi ba nasaun. Ne'e katak, ó tama kuandu ba kotuk, ó haree ó nia maun alin ne'e saida?. Akaba ba kotuk mais, ha'u mai kumpri lei no ordém, la inklina", afirma nia.
Komisaun rekrutamentu mós halo eliminasaun ba kandidatu ida husi Munisípiu Ermara, tanba la aprezenta-an tuir data ne'ebé anúnsia ona, inklui kadete João Pinto Araújo husi Munisípiu Dili nian ne'ebé deskonfia inan-aman sei hela iha Repúblika Indonézia (RI).
Entretantu, kadete foun sira ne'ebé iha loron 22 fulan-setembru, aprezenta-an ba Komandu Falintil-FDTL, hamutuk na'in-239, ne'ebé mai husi Munisípiu Dili 48, Likisá 27, Ermera 53, Aileu 30, Bobonaru 17, Manatuto 21, no Baukau iha na'in-43.
Tuir oráriu, iha loron kinta (23/09) aban, kadete foun husi Munisípiu Manufahi, Vikeké, Lautein, Covalima, Rejiaun Administrativa EspesialOekussi Ambeno (RAEOA) sei aprezenta mós an ba komisaun rekrutamentu antes ba tuir treinamentu militar durante fulan 6 iha Centro Formaçăo e Terreno (CFT), Nicolau Lobato, iha Metinaru, Dili. (*)