"Ita iha hela suspeitu ida iha Sela, e oras ne'e dadaun atu tama ona 72 oras. Tanba konduz sein karta. Nia lori motorizada la uza kapasete, karta kondusaun laiha, bainhira tama iha pasa revista la koopera, gráve liu", informa Komandante Tránzitu Munisípiu Dili, Inspetór Xefe, Domingos Sarmento Gama, iha kna'ar fatin Kaikoli, segunda (20/09).
Suspeitu ne'e, PNTL kaptura iha loron sesta (17/09), iha área Farol, tanba dezobediénsia ba lei kódigu estrada hanesan, la uza kapasete no laiha karta kondusaun (sim) laiha.
Tuir lei kódigu penál Timor-Leste nian, artigu 207, kona-ba kondusaun sein karta kondusaun, haktuir, ema ne'ebé uza veíkulu motorizadu maske laiha lisensa ne'ebé lei ezíje, sei hetan pena prizaun tinan 2 ka multa.
"Karta kondusaun laiha ne'e, krime, ita kontra kódigu penal, artigu 207, kona-ba konduz sein karta. Ne'e krime, gráve liu mak ida karta kondusaun laiha, lori transporte públiku", afirma nia.
Oras ne'e prosesu kazu ba suspeitu ho inisiál J ne'ebé PNTL detein, haruka ona ba Ministériu Públiku (MP) hodi hein desizaun ikus husi Tribunál.
"Ita hein kontinua prosesu ba Tribunál hodi hetan desizaun ikus iha Tribunál", dehan nia.
Tuir dadus, motorizada no karreta sira ne'ebé PNTL Dili prende durante semana ida, sura husi loron 11 to'o 17 Setembru 2021 ne'e, hamutuk 115, no reseita ne'ebé selu ona ba kofre Estadu hamutuk US$5181. (*)