Tempotimur (Aileu) – Operasaun Konjunta ne'ebé PNTL ho F-FDTL hala'o iha fim de semana ne'e, konsege kaptura membru husi grupu ilegál hamutuk 72.
Grupu ho naran, Riin Besi Asu Talin Be Korrente ne'e, ekipa konjunta kaptura iha Postu Laulara, Munisípiu Aileu.
Segundu Komandante PNTL Munisípiu Aileu, Superintendente Asistente Umbelina Soares hatete kapturasaun ba grupu ne'e, bazeia ba informasaun husi komunidade kona-ba atividade husi grupu ne'ebé laiha legalidade husi parte Governu.
“Sira dehan grupu ne'e grupu istóriku. Ne'ebé sira atu lori mai iha Aileu. Tanba, sira dehan Aileu ne'e fatin istóriku. Maibé, grupu ne'e laiha legalidade ruma para bele hetan autorizasaun,” hatete Umbelina Soares.
Hamutuk ho membru grupu nain 72, polísia mós prende evidénsia balun ne'ebé membru grupu ida ne'e uza hanesan, besi riin ida, vita mean no cruz, Bandera Nasionál RDTL, Bandera Partidu FRETILIN no bandera organizasaun Riin Besi Asu, Talin Be Korrente.
“Sira mai laiha autorizasaun nune'e polísia iha kompetensia tomak atu kaptura no halo investigasaun,” hateten Administrador Postu Aileu Vila, Marcos Dos Santos.
Entretantu, Koordenador Grupu Riin Besi Asu Talin Be Korrente, Marcelino Martins klarifika, atividades ne'ebé grupu ne'e hala'o, bazeia ba istóriku husi beiala sira katak la'ós atu ko'alia de'it bandera, maibé tenke ko'alia mós kona-ba Riin no Talin.