"Atividade ohin dadeersan ida ne'e, ita halo destruisaun ba kapasete sira ne'ebé mak la tuir standar durante ita-nia operasaun ka cheeck point ita prende. Kapasete sira ita halo destruisaun ne'e, 150 itál", dehan Komandante Tránzitu Munisípiu Dili, Inspetór Xefe, Domingos Sarmento Gama, iha lixu fatin Tibar, tersa (14/09).

Iha lei kódigu estrada, artigu 76, alinea 2, regula kona-ba utilizasaun kapasete husi motorista sira, tenke tuir estandarte, atubele salva ulun fatuk, bainhira hetan asidente ruma.
Maibé, dala-barak, kondutór ka motorista sira balu mai la kumpri lei kógidu estrada ne'ebé Governu hamosu ona.

"Tanba ne'e mak dadauk ita halo destruisaun ne'e, ida ne'e mak dehan katak kapasete ida la tuir standar. Tanba maior parte asidente sira fatal ka envolve asidente ema mate ne'e, barak liu mak parte ulun fatuk", dehan nia.

Enkuantu, atividade distribuisaun ne'e halo, tanba hetan despaixu husi Komandante Munisípiu Dili rasik katak, bele halo destruisaun.

Ba oin, Komandu PNTL Munisípiu Dili, sei kontinua halo operasaun ba motorista sira atu uza kapasete karik, tenke tuir lei kódigu estrada ne'ebé regula ona.

"Ita mós apela ba ita komunidade sira katak, ita hola kapasete ba pesoál ida-idak ne'e, intensaun atu seguru vida. La'ós hola kapasete para ho intensaun atu kompleta lei kódigu estrada depois iha dalan karik, labele hetan tilan. Intensaun maka ne'e, hola kapasete ne'e ho kualidade di'ak atu salva ita-nia vida, liliu parte ulun fatuk. Tanba ita-nia motorista sira laiha konsiénsia di'ak, entaun sira hola kapasete ida ne'e, para kompleta de'it, bainhira dalan polísia labele tilan. Mais laiha konsiénsia ida katak hola kapasete ida atu salva sira-nia vida rasik", hatete nia.

Atu evita ema labele fa'an kapasete la tuir estandarte, Komandu PNTL Munisípiu Dili mós halo ona koordenasaun ho parte Governu, liuhusi Ministériu Turízmu Komérsiu no Indústria (MTKI) atu regula emprezáriu sira labele importa kapasete la tuir estandarte mai Timor-Leste.

"Kadavéz, emprezáriu sira ne'e mak hatama kapasete la tuir standar, e prefere ida la tuir standar ne'e baratu liu, loos ka la'e. Entaun, ema hili mak ida baratu, duke karun. Agora, ida standar ne'e balu faa'n to'o US$75 ba leten. Mais ida ne'e di'ak liu para seguru ba ita-nia vida", afirma nia.

Maibé hato'o ba ministériu relevante liliu ministériu kompetente atu empreza sira importa sasán sira ne'ebé tuir lei aprova, liliu kapasete sira ne'e.
"Ita hanoin dehan ita-nia komunidade sira mak sala, mais Estadu mós tenke ser kontrola parte ida ne'e para depois oinsá mak ita bele prienxe rekezitu sira ne'ebé mak iha", dehan nia. (*)