Tanba iha fulan-Maiu tinan 2021 ne'e, Sistema baze dadus "Mobile Interpol Data Base and Fixed Interpol Data Base (Mind and Fine) husi Interpol nian iha Aeroportu Internasional Nicolau Lobato Komoro Dili, hodi deteta no identifiáa autór kriminozu sira bainhira halai sai husi sira-nia nasaun hodi tama mai territóriu Timor-Leste.
"Agora, servisu Interpol nian, liuhusi kanal interpol iha tinan ne'e (2021), ita monta tiha ona baze dadus ida liga ho migrasaun ninian, ita bolu dehan expansaun baze de dadus, sistema Mind and Fine. Ne'e sistema ida Interpol nian ne'ebé ita monta juntu ho migrasaun ninian atu kontrola ema estranjeiru sira ne'ebé mak tama mai iha Timor”, informa Adjuntu Diretór Nasionál PCIC, Adino Nunes Cabral, iha edifísiu PCIC, Kaikoli, segunda (13/09).
Tanba, sidadaun estranjeiru sira ne'ebé durante komete krime iha sira nasaun orijen, naran iha hotu ona lista Polísia Internasionál (Interpol) nian, nune'e bainhira tama iha nasaun sira ne'ebé instala ona sistema Mind and Fine ne'e rasik, automatikamente iha odamatan boot Aeroportu no fronteira sira.
"Atu kontrola sira, kuandu sira komete krime ruma, ne'ebé sira nia lista ne'e tama iha "data base" Interpol ninian, ita bele deteta, ajuda ema estranjeiru ne'ebé karik keta komete krime iha nia nasaun oríjen, nia labele mai iha ne'e (Timor) hodi halo fali atividade kriminal iha ne'e. Liliu ita prevene liuba finansiamentu terrorízmu brankeamentu kapitál”, hatete nia.
Iha periúdu sira uluk, Timor-Leste seidauk monta sistema ne'e iha Aeroportu Internasionál Prezidente Nicolao Lobato Komoro, tanba PCIC foin mak eziste, ho nune'e mak labele halo identifikasaun ba sidadaun estranjeiru sira ne'ebé tama mai.
"Uluk ita laiha sistema ida ne'e, entaun ema estranjeiru kuandu tama mai ita labele cheek nia, kuandu laiha data base Interpol. Mais agora data base Interpol eziste, ita bele hatene, keta ema estranjeiru ruma ne'ebé mak mai, iha hela atividade kriminal, tama iha lista, deteta iha sistema data base Interpol ninian, bainhira nia tama Aeroportu, ita halo triájen ba pasaporte, nia kose de'it iha sistema, ita hatene kedas. sistema deteta kedas", dehan nia.
Maibé, to'o oras ne'e parte PCIC rasik seidauk iha dadus ruma kona-ba sidadaun krimonu sira ne'ebé tama mai Timor-Leste, no ida ne'e siknifika katak, situasaun hotu sei la'o hela iha seguru laran.
Kona-ba solusaun bainhira sistema deteta duni sidadaun sira ne'e iha Aeroportu Komoro, katak sira komete duni krime iha sira-nia nasaun oríjen, solusaun ida mak tenke iha intervensaun husi autoridade judisiáriu sira-nia, no ida seluk mak sei prosesa tuir lei migrasaun nian.
"Iha solusaun rua, bainhira sistema deteta katak, ema ne'e tama hela ba data base Interpol nian, nia komete hela krime iha nia nasaun oríjen, entaun, ita trata iha oin rua. Ita liuhusi prosedimentu lei kooperasaun judisiáriu penal, tenke iha intervensaun autoridade judisiáriu ninian, atu solusiona. Ou bele liuhusi kanál lei ausilio migrasaun ninian, ne'ebé iha ne'ebá oras ida intervensaun ba liu iha servisu migrasaun mak solusiona", esplika nia.
Tuir planu, tinan (2022) oin PCIC sei instala tan ho sistema ne'ebé hanesan iha fronteira terestre Mota-ain ho Mota-masin entre Timor-Leste ho Indonézia, hodi kontrola sidadaun estranjeiru ne'ebé tama mai.
"Ita hanoin atu monta tan iha Mota-ain, Batugade iha tinan oin, ho sistema hanesan. Sistema ne'e montadu tiha ona iha Aeroportu Internasionál Nicolau Lobato, atubele kontrola", hatete nia. (*)
