Print this page

FONGTIL Konsidera PNTL La’ós Propriedade Euclides Belo

By September 10, 2021 3226
Koordenadór Advokasia FONGTIL, Ivo Colimau Lai Costa. Koordenadór Advokasia FONGTIL, Ivo Colimau Lai Costa. Foto Tempo Timor

Tempotimor (Dili)-Forum Organizasaun Noun Govermentál Timor-Leste (FONGTIL) konsidera Instituisaun Polísia Nasionál Timor-Leste (PNTL) liliu Unidade Patrolamentu Fronteira UPF la’ós propriedade privadu Komandante UPF, Superientedente Euclides Belo.

"Instituisaun PNTL hanesan Instituisaun Públiku, ne’ebé hala'o servisu hodi garante interese públiku iha setór seguransa, husi karater refere parte hotu livre investe ninia pontu de vista ne’ebé konstrutivu ba performa servisu PNTL. Karik UPF nu’udar Propriedade Privadu husi Señor Euclides Belo, konserteza FONGTIL sei la gasta tempu, enerjia no pensamentu hodi halo intervensaun ba servisu UP”, dehan Koordenadór Advokasia FONGTIL, Ivo Colimau Lai Costa, iha edifísiu FONGTIL, Kaikoli, sesta (10/09).

Tanba ne'e, bazeia ba esteitmentu ne’ebé liberta husi Komandante UPF Superintendente Euclides Belo, liuhusi Mídia iha loron 8 Setembru 2021, ne’ebé deklara FONGTIL la bele baralla situasaun no la bele tau kanuru ba asuntu seguransa nian.

Maibé FONGTIL hanesan Organizasaun Sosiedade Sivíl, ninia ezisténsia garante iha Konstituisaun RDTL artigu 43 nùmeru 1. (Liberdade Asosiasaun Nian), hodi hala'o ninia papel kontrolu sosiál ba asuntu Sosiu, Ekonomiku no Kultura, bazeia ba artigu 3.3 Mandatu FONGTIL kona-ba Advokasia.

Iha ne'e, FONGTIL mós hanesan observadór iha Conselho Estado Asuntu Defeza no Seguransa, ho kualidade refere mak, FONGTIL halo intervensaun ba asuntu seguransa nasionál.

Tanba Superientedente Euclides Belo rasik hasai esteitmentu, katak, "kilat manu bele oho ema ga la oho ema, Ha’u prontu bele sniper ida bele kaer tiru ha’u-nia liman, Ha’u mate ka lae,".

Ho esteitmentu refere FONGTIL konsidera hanesan intimidasaun, Kilat Manu tantu atu oho ema ka la’e, maibé hakanek de’it ema ne’e krime,no Kilat Manu konsidera nafatin Arma Ilegál, la'ó tanba de'it nia arma automatik ka la'e.

Haree husi kilat manu ne'e fo impaktu ba Seguransa Ambientál (Fauna) protejidu no abrigu ba artigu 20 nù 1, husi Lei nù 5/2017 de 19 de Abril. Aleinde hanesan mos Armas Brancas, ne'ebe ninia sirkulasaun lei bandu.

"Kilat Manu uluk kaptura lubuk ida iha tinan sanulu (10) kotuk liu ba”, deklara nia.

Ho ida ne'e, FONGTIL haree konfesaun husi Komandante UPF hatudu, laiha kapasidade hodi asegura linña fronteira hodi asegura sirkulasaun arma ilegál tama iha territóriu Timor-Leste. (*)

Rate this item
(3 votes)
Last modified on Friday, 10 September 2021 15:15
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items