Tanba sidadaun sira ne'e PNTL kapturadu iha área Manleuana entrega ba MP atubele prosesa tuir lei, tanba hala'o atividade Grupu Arte Marsiál (GAM) ho ilegál.
"Depois de prosesu investigasaun remata, ita sei aprezenta ba iha Ministériu Públiku, atu nune'e hodi deside", dehan Komandante PNTL Munisípiu Dili, Superintendente, Henrique da Costa, iha Komandu Jerál Kaikoli, kuarta (08/09).
Haree ba rezolusaun Governu 119/2021, hodi impoin Konfinamentu Obrigatóriu Jerál iha Munisípiu Dili atu hela iha uma, no bandu halibur malu liu ema na'in-sanulu.
"Mais sira ne'eba halo filafali atividade organizasaun ninian ne'ebé mak kontra rezolusaun refere. Tanba ne'e mak agora ita entrega ona ba parte ita-nia investigasaun Munisípiu Dili nian hodi halo prosesu", dehan nia.
Sidadaun sira ne'e autoridade seguransa no defeza, kaptura iha loron kuarta (08/09), maizumentus tuku rua madrugada, iha área Manleu, Suku Manleuana, Postu Administrativu Dom Aleixo, Munisípiu Dili, bainhira realiza hela eventu rituál arte marsiál nian.
Bainhira husu kona-ba atu ne'ebé sidadaun sira komete karik, viola mós rezolusaun Governu númeru 15/2017, kona-ba arma branka no bandu atividade marsiál, prosesu kontinuasaun sei la'o, tanba sira mós uza hotu atributu arte marsiál.
Ekipa konjunta sira ne'ebé hala'o kapturasaun ba sidadaun hirak ne'e mai husi Komandu Munisípiu Dili, Eskuadra Dom Aleixo, Unidade Espesiál Polísia (UEP), Unidade Polísia Marítima (UPM), no Falintil-FDTL, reprezenta húsi Polísia Militár (PM). (*)