"Iha dia 14 Agostu to'o 31 Agostu ne'e nia laran, totál ema ne'ebé mak tama sai ilegál iha fronteira Bobonaru, Oekussi no Covalima, hamutuk 153 pesoál. Husi fronteira Bobonaru, 44 pesoál, fronteira Covalima iha 33 pesoál, transaksaun ilegál ema na'in-4, sa'e sintu, ema na'in-37. Deportasaun husi portaun entrada Batugade Mota-ain, hamutuk 76 pesoál. Ida ne'e iha data ne'ebé mak ohin ha'u hatete tiha ona", dehan Portavóz Komandu Jerál PNTL, Superintendente Arnaldo de Araújo, iha Kaikoli, tersa (31/08).

Sidadaun hirak ne'e, PNTL kaptura, liuhusi atividade operasaun konjunta entre Unidade Patrullamentu Fronteira (UPF), Companhia Operação Especial (COE), Batallaun Ordén Públika (BOP) hamutuk ho membru Falintil-Forsa Defeza Timor-Leste (F-FDTL), destakadu iha fronteira Munisípiu Covalima, Bobonaru no Oekussi.

Tuir prosesu normal iha tempu pandemia Covid-19, bainhira sidadaun sira tama ilegál husi fronteira, Komandu PNTL sei koordena ho parte Ministériu Saúde (MS) hodi izola lai sira iha kuaretena durante loron 14 nia laran, hafoin sei prosesu tuir prosedimentu legal ne'ebé mak Timor-Leste iha.

"Hanesan ohin ha'u hatete ona, katak imi hotu hatene, akompaña katak, prosesu depois de 14 dias kurantena, sei entrega ba Munisípiu ne'ebé mak sira hakat ba ne'e, sira sei halo prosesu hanesan lei ne'ebé mak vigora ona iha ita-nia rain, e sei enkamiña hotu ba iha ministériu públiku", esplika nia. (*)