Tanba iha loron 25 fulan-agustu konvokatóriu ne'ebé diríje husi Komandante Jerál, ho Segundu Komandante Jerál iha Sentru formasaun Polísia, no hetan orientasaun ne'ebé presiza kontinua ba komandante eskuadra, seksaun atu kontinua hatutan ba membru sira iha terrenu hodi implementa iha servisu.
"Importánsia ida mós maka ohin ita halo enkontru ne'e, hodi orienta ita-nia komandante eskuadra sira, nomós xefe seksaun sira atu nune'e implementa konfinamentu domisiliáriu jerál ka lockdown ne'ebé mak sei aplika iha munisípiu Dili, hahú aban dadeer dia 27 Agostu 2021 to'o iha dia 02 de Setembru 2021", hatete Komandante PNTL Munisipiu Dili, Henrique da Silva, kinta (27/08).
Hafoin rona desizaun husi Konsellu Ministru nian ne'ebé deside konfinamentu iha kapitál Dili, mak dezde (25/08) lorokraik to'o (26/08), membru ne'ebé kolokadu iha kada ekipa halo kedas aviza ba komunidade sira iha populasaun atu obedese ba desizaun Governu nian, hodi evita propagasaun Covid-19.
"Aban (26/08), dadeer sei hahú ona ita-nia operasaun, atu nune'e haree ba fatin ka loja ka, ne'ebé mak la kumpri regra ne'ebé fó sai ona atu nune'e ita bele foti medida ruma ba sira. Purtantu, horisehik ho ohin ne'e ita ba halo aviza, depois aban ita implementa ona, atu nune'e komandante eskuadra sira, seksaun sira hahu ohin ne'e ba oin, sira tenke halo serbisu maka'as ba ida nee", nia afirma.
Maneira ne'ebé sei uza iha loron sesta (27/08) hodi kontrola populasaun iha Dili, mak sei halo patrulla ho katera, aviza ho toa, la'o ain tama sai bairru sira, merkadu sira, nune'e bele informa ba populasaun hotu kumpri.
"Horisehik lokraik nomós ohin nia, ita sei halo vizita ba ita-nia komunidade sira iha kapital Dili, liliu fatin sira ne'ebé mak ema rame ka ema barak atu nune'e hodi aviza ba sira atu nune'e bele hatene e aban ita implementa ona konfinamentu domisiliáriu ida ne'e husu, atu nune'e ita-nia komunidade sira bele komprende e halo tuir", haktenik nia.
Nune'e mós, komandu Munisípiu Dili sei kontinua halo destakamentu ba nia membru sira iha postu entrada sira hamutuk ho ekipa saúde sira hodi kontrola movimentu ema tama kapitál Dili.
Entretantu, desizaun Governu hodi aplika konfinamentu iha Dili, sei vale durante semana ida, hahú husi aban loron 27 Agostu, maizumenus tuku 00:00, oras madrugada, to'o loron 2 Setembru 2021, oras 00:00 madrugada. (*)
