"Polísia nasionál implementa de'it, kuandu desizaun ne'e tun ona, hakarak ka lakohi tenke ezekuta, labele dehan katak labele. Ne'e tenke ezekuta, kuandu desizaun ne'e tun ona, ami kumpri de'it, bainhira de'it mak atu mai, ami kumpri", dehan Komandante Operasaun Nasional iha PNTL, Superintendente Polísia, Pedro Belo, hafoin sorumutuk avaliasaun seguransa iha Sentru Formasaun Polisia (CFP), Komoro, kuarta (25/08).
Deklarasaun ne'e hodu responde ba deklarasaun husi Primeiru Ministru (PM), Taur Matan Ruak nian, durante partisipa iha debate estensaun Estadu Emerjénsia (EE) ba dala-17, iha plenária Parlamentu Nasionál, ne'ebé dehan, molok mandatu remata, sei monta membru F-FDTL iha fronteira hodi asegura seguransa ba povu.
Maske nune'e, Komandu PNTL, liuhusi UPF hamutuk ho Komandu Operasaun Espesial (COE), Batallion Ordém Públika (BOP) ho espíritu nasionalízmu ne'ebé iha, sei asegura nafatin seguransa ba povu ho nasaun RDTL.
"Maibe, até agora, Governu ho Estadu nafatin fiar UPF iha ne'ebá, UPF nafatin asegura, serbisu nafatin hanesan baibain, sei nunka mais atu dehan katak, tanba de'it ami atu retira, la’e. Nunka mais hanesan ne'e. Sira ne'ebé iha ne'ebá, ho espiritu ne'ebé maka'as, hodi kontinua nafatin asegura iha fronteira ne'ebá", afirma Pedro. (*)