“Atu informa de’it horikalan (24/08) ita halo operasaun koordenada ne’ebé mak halo husi PNTL Munisípiu Bobonaro, UPF, servisu Sekreta sira iha área Bobonaro, liliu iha Maliana, aguarda tan sidadaun na’in-4, ne’ebé deskonfia sira fila husi Indonézia”, esplika komandante UPF, Euclides Belo, iha Sentru Formasaun Polísia, Komoro, kuarta (25/08).
Daudaun ne’e sidadaun Timoroan na’in-4 iha hela prosesu identifikasaun no sei entrega ba parte saúde Bobonaro nian hodi evita propagasaun moras Covid-19.
“Alende na’in-haat ne’e, horikalan iha postu Alto Lebos mós simu sidadaun ida husi Maliana ne’ebé entrega-an ba ita-nia membru PNTL no F-FDTL no daudaun submete ona ba kuarantena tanba deskufia nia mós fila husi Indonézia”, dehan nia.
Husu nafatin ba komunidade sira iha liña fronteira atu informa ba parte seguransa karik deskunfia timoroan balu ne’ebé fila husi nasaun viziñu Indonézia hodi kumpri protokolu saúde nian.
“Ami nafatin informa ba komunidade sira liliu sidadaun sira iha liña fronteira katak timoroan sira ne’ebé mak hakat ba nasaun viziñu fila mai labele subar”, afirma nia.
Sidadaun ne’ebé komete iregularidade hodi kontra lei tenke kumpri uluk lai protokolu saúde nian hafoin mak hatan ba prosesu tuir mai. (*)