“Situasaun agora dadauk la seguru, tanba ami agora dadauk hasoru hela problema rua. Primeiru, ha’u-nia komunidade sira moris la hakmatek tanba sidadaun ka komunidade Indonézia kada loron mai hela de’it tama ita-nia rain, kuaze to'o kilómetru 10, nia objetivu mai halo saida?. Mai na'ok ita-nia rikusoin. Ita-nia rikeza natureza, ita-nia animal protezidu sira, rikeza natureza mak hanesan kinur, ai-kameli, maek”, informa Xefe Suku Beleulik-Leten, Quintino José Amaral, ba www.tempotimor, liuhusi tefelone, domingu (22/08).
Tuir informasaun ne'ebé husi komunidade sira katak, relasiona ho insidente ne'ebé mosu iha loron 28 fulan-Jullu 2021 liubá, komunidade sira ho TNI (Tentara Nasionál Indonézia) konsege hakanek komunidade balu iha suku laran.
“Tanba sira tuir hela sira-ninia animal, hakat liu fronteira, la hatene sé mak muda, ka animal rasik mak mai, to'o agora seidauk hatene ninia motivasaun”, dehan nia.
Hafoin insidente ne'e, PNTL liuhusi Unidade Patrullamentu Fronteira (UPF), asegura hela ema nia animal (karau vaka hamutuk 6), iha postu polísia, maibé to'o agora seidauk iha solusaun atu entrega fali ema nia animal sira ne'e ka la’e.
“Agora ha'u ezíje para parte relevante tenke buka lalais solusaun para entrega tiha ka la’e, animal hirak ne'e fó liu tiha ba leten, ba ema ida ne'ebé mak iha kompeténsia atubele asegura ka salva guarda ema nia animal ne'e. iha karau 6, karau vaka, e agora dadauk iha hela eskuadra PNTL ita-nian, ha'u mós hanoin fali ita-nia seguransa sira, sira mak agora sai na’in fali ba ema nia animal ne'e, agora ida oan tiha ona, ne'ebé karau 7 tiha ona, rua hahoris tan. Ida ne'e kuitadu, la fó hán, la fó bee”, afirma nia.
Nune'e, husu ba Komandu PNTL, atu haree rezolve preukupasaun ne'e ho sériu, liu-liu mak hasa'e kuantidade membru seguransa iha área fronteira Belulik-Leten nian, tanba sente moris la ho seguru.
“Pesoál seguransa, ami labele halo buat ida tanba ami só hato'o de'it informasaun. Tanba ne'e presiza aumenta tan pesoál seguransa iha liña fronteira”, afirma nia.
Entretantu, Suku Belulik-Leten, kompostu husi Aldeia Baleo, Belulik-Kraik, Maneki'ik, Belulik-Leten, ho totál Populasaun hamutuk 2223, husi Uma-kain 487. (*)