Banihira sidadaun sira mak la tuir loron ne'ebé determina ona, mak autoridade seguransa ho defeza husi nasaun rua nian, sei la fó ona toleránsia.

“Purtantu, ohin (21/08) mós ha'u parsialmente ko'alia mós ho Dandim Belu, Tenente Koronel, Letkol Miki, para depois sira ne'ebé mak ilegalmente mak sei sirkula la'o hela iha ema nia nasaun ne'e, viola ema nia lei, viola mós Timor-Leste nia lei. Tanba ne'e mak Dandim fó hatene ba ha'u ona katak sira fó ona ultimatu ba sira timoroan ne'ebé maka ilegalmente sei iha ema nia nasaun ne'e, tantu iha Belu, tantu iha Munisípiu ou Kabupaten seluk to'o iha, provinsiia NTT (Nusa Tengara Timur) to'o iha Kupang, nune'e mós balu ne'ebé mak sei ilegalmente, maibé bele la'o liuhusi Illa Timor, liliu NTT, to'o Jawa sira, sira (Militár Indonézia) fó ona ultimatu para kinta semana oin ne'e sira tenke entrega-an hotu para bele deporta fila mai Timor-Leste", hatete Komandante UPF, Superintendente Polísia, Euclides da Costa Belo, iha servisu fatin fronteira Batugade, sábadu (21/08).

Tanba ne'e, timoran sira ne'ebé mak sei iha ema nia nasaun, di'ak liu akompaña iha mídia entrega-an lalais ba autoridade seguransa, atu nune'e autoridade seguranssa Indonézia no forsa defeza Indonézia nian bele entrega formalmente liuhusi Portaun ida de'it, Portaun Mota-ain (Covalima) no Mota-masin (Maliana), nomós bele entrega-an ba Portaun legal ne'ebé mak iha Oekussi nian.

“Liu tiha kinta-feira (26/08) ba oin, ne'e parte TNI, parte seguransa sei laiha eskapa (laiha toleránsia) ba ida ne'e. Ho ida ne'e, ami sei serbisu hamutuk nafatin, koordenada informalmente ho autoridade seguransa Indonézia liuhusi komunikasaun ne'ebé maka ami lansa ona para bele servisu hamutuk nafatin”, afirma nia.

Tuir dadus, sidadaun timoroan sira ne'ebé hakat illegál husi fronteira terrestre ba rai Indonézia, hafoin autoridade seguransa Indonézia kaptura no deporta mai Timor-Leste liuhusi odamatan formal Batugade, totál hamutuk ona ema na'in-629. (*)