"Ita haree filafali ba ekipa koordenasaun ba ne'ebá ne'e, señor doutor Longuinhos sira ba hala'o iha ne'ebá, iha semana kotuk ba, tanba ne'e mak ita haree rezultadu ida ne'ebé di'ak, e sira husi militár, polísia Indonézia, oinsá mak reintegra fali ita-nia ema sira ne'e mai iha ne'e. Agora dadaun ne'e iha 164 maka ita simu, iha ne'e ita haree iha na’in-tolu mak sintomas (Covid-19), ne'ebé ita tau iha karreta ketak”, dehan, Estadu Maior Koordenadór, Segundu Adjuntu Operasaun (Sala Situasaun Sentru Integradu Jestaun Krize (SS-SIJK), Superintendente Polísia Marcos Sequeira, iha fronteira Batugade, sábadu, (21/08).

Sidadaun hirak ne'e, kompostu husi feto na'in-5 no mane hamutuk ema na'in-159, ne'ebé POLRI deporta mai Timor-Leste liuhusi autoridade seguransa iha fronteira Batugade.

"Sira na'in hirak ne'e ita sei lori ba Dili, no ba kuarentena, fora de Dili, tanba iha Dili laran agora nakonu. Sira sei koloka ba fatin ida de'it iha Baukau”, informa nia.

Ekipa konjunta seguranasa iha fronteira identifika sira ne’e husi Munisípiu Ermera, Maliana, iha mós Baukau oituan, no Dili mak sempre lori númeru boot liu.

Enkuantu, sidadaun hamutuk ema na’in-164 ne'e, ekipa SIJK transporta mai kapitál, hodi kumpri kuarantine durante loron 14, hafoin kontinua ba prosesu kriminal.

Tuir observasaun www.tempotimor.com iha terrenu nota, sidadaun hirak ne'e, autoridade seguransa TL nian iha fronteira terrestre Batugade, transporta iha kamioneta husi CLN-MCIA nian 2, 03.787 G, Bus UNTL nian ida ho Xapa matrikula 06.640 G, Mini-bus ida ho númeru matrikula 04.484 G, no Mini bus ida ho númeru 02.745 G. (*)