“Ha’'u hatete loloos katak, seguransa fronteira ne'e loloos forsa defeza ninia misaun, la'ós polísia ninian. Maibé, uluk nasaun unidas deside ona hanesan ne'e, entaun ne'e mak tau fali polísia iha fronteira, F-FDTL la ba fronteira tan, ikus mai mak ha'u toma inisiativa husu Governu mak haruka ita-nia forsa sira agora iha fronteira. Mas loloos ne'e, la'ós polísia”, deklara Lere Anan Timur, hafoin serimónia Aniversáriu Falintil ba dala-46, iha Kuartel Jenerál, Fatuhada, sesta (20/08).

Ho prezensa husi membru PNTL nian iha área fronteira, halo militár sira nasaun Repúblika Indonézia nian sira mós la kontente, tanba kestaun dignidade.

"Até Indonézia, ha'u bele dehan, Tentara Indonézia la kontente. La kontente ho prezensa polísia iha ne'ebá. Purke tanba sira-nia dignidade, mas ha'u polísia ida, ha'u agora ba halo fali kooperasaun ho sivíl ida. Entaun, ne'e mós ha'u hanoin katak ita-nia Governu komesa haree dadauk, halo oinsá mak koloka forsa sira iha fronteira nu'udár defeza externa, e polísia nu'udár defeza seguransa interna. Mas agora Governu ne'e mós kria kondisaun, infraestruturas, meius hanesan viatura, buat hothotu ne'ebé que presiza atu militár sira bele kumpri ninia misaun nu'udár militár”, hatete nia. (*)