Funsionáriu públiku na'in-5 ne'e, nu'udár sidadaun timoroan, husi Munisípiu Ainaru, no entre sira, na'in-1 nu'udár funsionáriu iha Ministériu Edukasaun Juventude no Desportu (MEJD), husi Ministériu Saúde (MS) iha na'in-2, Ministériu Justisa (MJ) nian 1, no na'in-1 seluk nu'udár funsionáriu iha empreza Telekomunikasaun Telemor.

“Foin dader iha ne’e, ita-nia membru UPM Suai nian halo kapturasaun ba membru arte marsiál sira kompletu ho atributu organizasaun PSHT hamutuk na’in-5 ne’ebé tama husi área Betun nian mai iha Mota Masin. Husi sira na'in-5 ne’e iha funsionariu públiku husi Munisípiu Ainaru iha ema na'in-4 mak profesór na’in-1, Ministeriu Saúde na’in-2, Ministériu Justisa na'in-1 nomós husi Maliana mak funsionáriu Telemor na’in-1”, informa Komandante UPM, Superintendente Basilio de Jesus, liuhusi karta komunikadu ne'ebé www.tempotimor.com asesa, sesta (20/08).

Sidadaun na'in-5 ne’e, sai husi área Timor-Leste ba Indonézia iha loron kuarta (04/08), no sa’e sabuk iha Indonézia iha loron 16 Agostu, no daudaun ne’e entrega ona ba ekipa Saúde hodi kumpre kuarentena durante loron 14 nia laran.

Entretantu, sidadaun na'in-lima ne'ebé UPM identifika nu'udár funsionáriu públiku ne'e, kaptura iha sesta (20/08), oras dadeer, iha área Mota-masin, Munisípiu Covalima, bainhira fila husi atividade GAM iha Atambua. (*)